ٓاڈپی 16؍ستمبر (ایس ا و نیوز)معمولی سی بات پر ایک بین الاقوامی شہرت یافتہ کھلاڑی(ایتھلیٹ) پر دولوگوں نے حملہ کرکے بری طرح زخمی کردیاجسے علاج کے لئے اسپتال میں داخل کردیا ہے اور پولیس نے حملہ آوروں کو گرفتار کرلیا ہے۔

موصولہ رپورٹ کے مطابق حملے میں زخمی ہونے والی خاتون کا نام سولتھا کامتھ ہے جس نے بین الاقوامی سطح پر تجربہ کار افراد کے لئے منعقدہ میراتھن واک اور ریس میں کئی بار حصہ لیا ہے اور تمغے جیتے ہیں۔کہا جاتا ہے کہ سولتھا نیشنل ہائی وے 66کے کنارے واقع اپنے گھر کے کمپاؤنڈ میں ایک چائے کی دکان چلاتی ہے جو دیر رات تک کھلی رہتی ہے۔ لیکن کل آدھی رات کے قریب جب وہ اپنی چائے کی دکان بند کرکے سوگئی تو تقریباً 3.30بجے کُندر اوردکشیت نامی دو نوجوانوں نے گھر کی گیٹ پر دستک دی اور چائے اور آملیٹ کا مطالبہ کیا۔ نیند سے جاگنے والی سولتھا نے جب دکان بند ہونے اور ان کا مطالبہ پورا نہ کرنے کی بات کہی تو وہ دونوں زبردستی گیٹ کھول کر اندر داخل ہوئے اور پاس میں پڑا ہوا ایک پتھر اٹھاکر کُندر نے سولتھا کے چہرے پر دے مارا۔اس سے سولتھا کا چہرہ زخمی ہوگیا اورناک کی ہڈی فریکچر ہونے کے ساتھ بری طرح خون بہنے لگا۔اس دوران دکشیت نامی ملزم نے اپنے ہاتھوں سے سولتھا کی پٹائی جاری رکھی۔ جب سولتھا کے شوہر اور بیٹے وغیرہ اس کی مدد کو دوڑ پڑے تو دوونوں حملہ آوروں نے ان کے ساتھ گالی گلوچ کی۔سولتھا کی بیٹی نے فون پر پولیس کو اطلاع دی اور نائٹ پٹرولنگ کررہی پولیس ٹیم نے موقع پر پہنچ کر دونوں حملہ آوروں کو گرفتار کرلیا۔

کاپ پولیس اسٹیشن میں معاملہ درج کرلیا گیا ہے۔