اُڈپی 18؍مارچ(ایس او نیوز) ریاستی حکومت کی طرف سے سرکاری اسکولوں میں زیرتعلیم طلباء کو ’شو بھاگیہ ‘ اسکیم کے تحت مفت جوتے اور سوکس فراہم کیے جاتے ہیں۔اس سرکاری اسکیم سے ناجائز فائدہ  اٹھانے کے چکر میں ایک ہیڈماسٹرکو سلاخو ں کے پیچھے جانا پڑا۔

ذرائع سے ملی اطلاع کے مطابق   ہیری اڈکا کے ہائر پرائمری اسکول کو منی پال کی ایک پارٹی نے مذکورہ اسکیم کے تحت جوتے اور سوکس سپلائی کیے تھے اوراس تعلق سے جملہ 109,000روپے کا بل باقی تھا۔بل کی رقم جاری کرنے کے لئے مبینہ طور پر اسکول کے ہیڈ ماسٹر ایم کے واسو دیوا کی طرف سے آنا کانی کرتے ہوئے 10ہزار روپے رشوت طلب کی جارہی تھی۔ بالآخر 7ہزار روپے پر بات طے ہوگئی۔ لیکن جب ہیڈماسٹر رشوت کی رقم وصول کررہا تھا تو اینٹی کرپشن بیوریو کے افسران نے چھاپہ مارکر اسے رنگے ہاتھوں گرفتار کرلیا۔ پھر اسے عدالت میں پیش کرنے کے بعد عدالتی تحویل میں بھیج دیا گیا ہے۔اے سی بی افسران کا کہنا ہے کہ اس سے قبل بھی واسو دیوا پر طلباء سے غیر قانونی طور پر پیسے وصول کرنے کی شکایت ملی تھی اور تحقیقات کے بعد یہ الزام سچ ثابت ہواتھا۔