ممبئی سے کیرالہ جانے والی نیتراوتی ایکسپریس ٹرین سے 1.65کروڑ روپے غیر محسوب رقم کے ساتھ 2مسافر گرفتار
اڈپی2؍نومبر (ایس اونیوز) ممبئی سے کیرالہ کی طرف جانے والی نیتراوتی ایکسپریس ٹرین کی ایئر کنڈیشنڈ بوگی میں بغیر کسی دستاویز کے 1.65کروڑروپے غیر محسوب رقم کے ساتھ سفر کرنے والے 2ملزمین کو ریلوے پروٹیکشن فورس کے عملے نے گرفتار کرلیا ہے۔
معلوم ہوا ہے کہ گرفتار ملزمین کا تعلق راجستھان سے ہے۔رات 4.30بجے کے قریب ایئر کنڈیشنڈ بوگی میں موجود ان مسافروں پر ریلوے پولیس کو کچھ شک ہوا۔ پھر جب انہوں نے ان کے سامان کی تلاشی لی تو اس کے اندر 1.65کروڑ روپے نقد پائے گئے جس کے تعلق سے ان کے پاس کوئی قانونی دستاویز یا ثبوت موجود نہیں تھے۔ انہوں نے صرف یہ بتایا کہ وہ لوگ کیرالہ میں کوئی جائداد خریدنے کے لئے جارہے ہیں۔
ریلوے پولیس نے ان لوگوں کو گرفتار کرنے کے بعد منی پال پولیس کے حوالے کیا ہے۔مزید تحقیقات جاری ہے۔