سرسی میں رقم دوگنی کرنے کے نام پر دھوکہ دینے والے دو ملزم گرفتار۔ ایک فرار
سرسی 7؍اگست (ایس او نیوز) بھولے بھالے عوام کو رقم دوگنی کرنے کا لالچ دے کر لوٹنے والے دو ملزمین کو پولیس نے گرفتار کرلیا ہے، جبکہ تیسرا ملزم فرار ہونے میں کامیاب ہوگیا ہے۔
سرسی پولیس کے بیان کے مطابق گرفتار ملزمین کی شناخت داونگیرے کے رہنے والے رنگناتھ شیواننداپا اورہرسن ہلّی کے رہنے والے پروین ناگراجپا مانڈلگیری کے طور پر کی گئی ہے۔ پروین کے بارے میں بتایا جاتا ہے کہ وہ سرسی میں واقع آشیرواد مائکرو فنانس میں ملازم ہے۔
ذرائع سے ملی اطلاع کے مطابق رنگناتھ اور پروین دونوں ملزمین موہن سرسی کر نامی شخص کے ساتھ مل کر شہر کی ویویکانند لاڈج میں رقم دوگنی کرنے کا جھانسہ دے کر دھوکہ دہی کاکام انجام دے رہے تھے۔ شہری پولیس تھانے کی کرائم سب انسپکٹر مالنی ہاسباوی نے مصدقہ اطلاع کی بنیاد پر مذکورہ ہوٹل میں چھاپہ مارا توموہن سرسی کر نامی ملزم وہاں سے فرار ہونے میں کامیاب ہوگیا۔ بقیہ دو لوگوں کوگرفتار کرنے کے علاوہ پولیس نے روم میں موجود کالے پیپر کے ٹکڑوں کے بنڈل ، زعفرانی رنگ کے کیمیکل کی ایک بوتل، دو موبائل فون اور دو بیگ ضبط کرلیے ہیں۔
سرسی ٹاؤن پولیس اسٹیشن میں معاملہ درج کرلیا گیا ہے۔