بیندور کےقریب اوتینانی میں آج تیسری مرتبہ چٹان کھسکنے کی واردات؛ ہائی وے پھر بند
بھٹکل 12/جون (ایس او نیوز) یہاں سے قریب 15 کلو میٹر دور بیندور کے قریب اوتینانی گھاٹ پر آج تیسری مرتبہ چٹان کھسکنے کی واردات پیش آنے کے بعد نیشنل ہائی وے پھر بند ہوگیا، جس سے سواریوں کو سخت دشواریوں کا سامنا کرناپڑا۔ ہائی وے پر پڑے ملبے کو ہٹانے کے لئے کئی گھنٹے درکار تھے جس کو دیکھتے ہوئے سواریوں کے لئے متبادل انتظام کیا گیا۔شیرور سے بیندور جانے والوں کے لئے موتّوڑی کا روڈ دیا گیا ہے جبکہ سواریوں کو بیندور سے شیرور جوڑنے کے لئےڈومبے کا روڈ دیا گیا ہے۔
موسلادھار بارش کے نتیجے میں پہاڑی پر سے کثیر مقدار میں پانی فالس کی شکل میں بہتا نظر آیا، جس کے ساتھ ہی پہاڑی پر سے مٹی کے تودے ہائی وے پر گرنے شروع ہوگئے، بڑی مقدار میں مٹی کے تودے گرنے سے پوری سڑک بند ہوگئی اور پوری سڑک مڈ میں تبدیل ہوگئی۔ آئی آر بی کی جانب سے سڑک کی صفائی کا کام جاری تھا۔
اوتینانی میں بار بار چٹانیں گرنے کی شکایتیں موصول ہونے کے بعد آج اُڈپی ڈپٹی کمشنر میری پرینکا فرانسس موقع پر پہنچی اور حالات کا جائزہ لیا۔ان کےساتھ کنداپور اسسٹنٹ کمشنرشلپا ناگ بھی موجود تھیں۔