بھٹکل میں چوری کی عجیب واردات؛ 20 لاکھ سے زائد مالیت کے زیورات لے کر چور فرار
بھٹکل 14/مارچ (ایس او نیوز) بھٹکل کے چہل پہل والے علاقہ اولڈ بس اسٹائنڈ میں واقع ایک جویلری دکان کے باہر رکھی ہوئی سونے کے زیورات سے بھری بیگ اسکوٹر میں رکھ کر کچھ ہی منٹوں کے اندرغائب ہوگئی، یہ واردات منگل کی رات قریب نو بجے پیش آئی۔
دکان مالک اودے کیشو شیٹ نے بتایا کہ وہ ہمیشہ کی طرح اپنی جویلری کی دکان شری ویملیشوری جویلری ورکس کو بند کرکے زیورات سے بھری بیگ لے کر باہر آئے ، اپنی اسکوٹر کی ڈکی کھولی اور اس کے اندر حفاظت کے ساتھ رکھ دیا، پھر پڑوس میں واقع فروٹ کی دکان سے فروٹ کو خریدا ۔ جب فروٹ رکھنے کے لئے دوبارہ اسکوٹر کی ڈکی کھولی تو حیرت انگیز طور پر زیورات سے بھری بیگ غائب ہوچکی تھی۔
اودے کیشو شیٹ کے مطابق بیگ کے اندر قریب 700 گرام کے سونے کے زیورات اور پانچ لاکھ روپیہ نقد رقم تھی، چوروں نے پوری بیگ کو ہی اُٹھا کر نو دو گیارہ ہوگئے۔
بیگ کی چوری کا اُودے شیٹ پر ایسا اثر ہوا کہ اُسی وقت اُسے ہلکا دل کا دورہ پڑ گیا، اسے فوری طور پر قریبی ویلفئیر اسپتال لے جایا گیا اور ضروری طبی امداد پہنچائی گئی۔
اطلاع ملتے ہی ٹائون پی ایس آئی کُڈگُنٹی اپنے عملہ کے ساتھ جائے وقوع پر پہنچ گئے اور چھان بین شروع کردی۔ جویلری دکان کے اندر لگے سی سی ٹی وی کیمرے کے فوٹیج کو دکھانے کے لئے جب پولس نے کہا تو پتہ چلا کہ کیمرے کام ہی نہیں کررہے ہیں۔
پولس واقعے کے تعلق سے تحقیقات کررہی ہے۔
