بھٹکل 15/ستمبر (ایس او نیوز) بھٹکل کے جالی میں دن دھاڑے چوری کی واردات پیش آئی ہے جس میں چوروں نے ایک گھنٹے کے اندر اندر گھر میں گھس کر پوری الماری صاف کردی ہے۔ چوری کی یہ واردات جالی میں جمعہ کو پیش آئی جب گھروالے گنیش تہوار کے موقع پر پوجا کرنے کے لئے گھر سے کچھ ہی فاصلے پر واقع پوجا کی تقریب میں شریک ہونے کے لئے گئے تھے۔
پولس نے بتایا کہ جمعہ کو گنیش تہوار کے موقع پر ہیبلے پنچایت کے سکریٹری لنگپا نائک پچھواڑے کے دروازے کو یہ سوچ کر لاک نہیں کیا کہ پوجا کی تقریب گھر کے سامنے ہی واقع ہے اور کچھ ہی دیر کی بات ہے، دروازے کی کُنڈی ڈال کر وہ اور دیگر اہل خانہ پوجا کے لئے نکل گئے، ایک گھنٹے کے اندر اندر یہ لوگ واپس آئے تو گھر کا حال بے حال تھا۔الماری کُھلی ہوئی تھی اور دس ہزار نقدرقم سمیت بچوں کو انعام میں ملی ہوئی سونے کی انگوٹھیاں سمیت دیگر زیورات پر ہاتھ صاف کرلیا گیا تھا۔ لنگپا نائک نے فی الحال دو لاکھ مالیت کی چوری کا اندازہ لگایا ہے، مگر اس سے زائد قیمتی اشیاء بھی چوری ہونے کا اندیشہ ظاہر کیا ہے،کیونکہ رات دیر گئے تک اُنہیں خود اس بات کا اندازہ نہیں تھا کہ الماری میں مزید کیا چیزیں تھیں جو چوری ہوئی ہیں۔
پولس نے شبہ ظاہر کیا ہے کہ چور کوئی جان پہچان والا یا قریبی علاقہ کا ہوسکتا ہے۔ پولس نے مزید بتایا کہ پوجا پاٹ کی تقریب میں سینکڑوں لوگ شریک تھے اور لنگپا نائک کے اطراف بھی کافی گھر ہیں، اس لئے اُنہیں یقین ہے کہ کسی نہ کسی نے چور کو گھر کے اندر گھستے ہوئے دیکھا ہوگا۔
بھٹکل ٹائون پولس تھانہ میں معاملہ درج کیا گیا ہے اور پولس چھان بین میں لگ گئی ہے۔