بھٹکل میں چوری کی ایک زبردست واردات ناکام؛ پڑوسیوں کو دیکھ کر چور زیورات پھینک کر فرار
بھٹکل 30/ڈسمبر (ایس او نیوز) یہاں حنیف آباد کے ایک مکان میں چوری کی ایک زبردست واردات اُس وقت ناکام ہوگئی جب پڑوسیوں کو دیکھ کر چور زیورات سے بھری تھیلی کو قریبی کمپائونڈ میں پھینک کر فرار ہوگیا۔ چوری کی واردات مغرب اور عشاء کی آذان کے درمیان یعنی ڈیڑھ گھنٹے کے دوران پیش آئی تھی، مگر جیسے ہی چور نے دیکھا کہ پڑوسی اور آس پاس کے لوگوں نے اُسے چوری کرتے ہوئے دیکھ لیا ہے، اُس نے زیورات کو سامنے والے کمپائونڈ میں پھینک دیا اور فرار ہوگیا۔
مالک مکان جناب سیف اللہ ائیکری نے ساحل آن لائن کو بتایا کہ وہ اور سبھی گھر والے مغرب کی آذان کے وقت گھر پر تالہ لگاکر مدینہ کالونی میں واقع اپنی بیٹی کے گھر گئے تھے، رات قریب آٹھ بجے پڑوسیوں نے اطلاع دی کہ اُن کے گھر کے اندر کوئی موجود ہے، اطلاع ملتے ہی ہم لوگ دوڑے دوڑے گھر واپس آئے، دیکھا تو گھر کے دروازے کی کُندی ٹوٹی ہوئی تھی اور اندر تمام الماریاں کھلی ہوئی تھیں، جبکہ سبھی زیورات غائب تھے۔
جناب سیف اللہ کے مطابق گھر کی الماریوں میں رکھے ہوئے سونے کے زیورات جس میں تین نیکلس سیٹ، گولڈ چین، کان کی بالیاں، چوڑیاں، انگوٹھیاں سمیت قریب 300 گرام کے سونے کے زیورات پر چوروں نے ہاتھ صاف کرلیا تھا، جس کی مالیت قریب آٹھ لاکھ روپیہ لگائی گئی تھی۔
چوری کی اطلاع پھیلتے ہی اطراف کے علاقوں کے کافی لوگ ان کے گھر کے باہر جمع ہوگئے جس کے دوران کچھ نوجوانوں نے اطراف کے کمپائونڈوں میں تلاشی شروع کردی، اور حیرت انگیز طور پر ایک کمپائونڈ میں تمام زیورات ایک کپڑے میں لپٹے ہوئے پائے گئے۔
مضافاتی پولس تھانہ میں معاملے کے تعلق سے خبر کی گئی ہے اور پولس نے جائے وقوع پر پہنچ کرجائزہ لیا ہے۔
جناب سیف اللہ نے تمام زیورات ملنے پر اللہ کا لاکھ لاکھ شکر ادا کیا ہے، ساتھ ساتھ پڑوسیوں اور مقامی نوجوانوں کا بھی انہوں نے شکریہ ادا کیا ہے۔
