پلوامہ میں نیشنل کانفرنس لیڈر کے گھر پر حملہ، ایک پولیس اہلکار ہلاک، ہتھیار بھی چھین لیے گئے
سری نگر17جولائی(ایس او نیوز؍آئی این ایس انڈیا)جنوبی کشمیر کے ضلع پلوامہ کے مرن میں پیر کے روز جنگجوؤں نے نیشنل کانفرنس کے ایک لیڈر کی حفاظت پر مامور ریاستی پولیس کے اہلکاروں پر فائرنگ کرکے ایک کو ہلاک جبکہ دوسرے ایک کو شدید طور پر زخمی کردیا۔ جنگجو دونوں ریاستی پولیس کے اہلکاروں کی سروس رائفلیں چھین کر فرار ہوگئے ہیں۔ سرکاری ذرائع نے بتایا کہ جنگجوؤں نے پیر کی شام ضلع پلوامہ کے مرن میں نیشنل کانفرنس لیڈر غلام محی الدین کی حفاظت پر مامور ریاستی پولیس کے اہلکاروں پر فائرنگ کی۔
انہوں نے بتایا ’جنگجوؤں کی فائرنگ سے دو اہلکار شدید طور پر زخمی ہوئے۔ انہیں نزدیکی اسپتال لے جایا گیا جہاں ایک اہلکار زخموں کی تاب نہ لاتے ہوئے دم توڑ گیا‘۔ مہلوک پولیس کانسٹیبل کی شناخت مدثر احمد کی حیثیت کی گئی ہے۔ زخمی پولیس اہلکار جس کی شناخت نذیر احمد کی حیثیت سے کی گئی ہے، کو مقامی اسپتال سے سری نگر کے اسپتال منتقل کیا گیا ہے۔ ان کی حالت بھی تشویشناک بتائی جارہی ہے۔