مینگلور24 فروری (ایس او نیوز) کل سنیچر 25 فروری کو سنگھ پریوار کی جانب سے مینگلور میں ہڑتال کے اعلان کے بعد بھلے ہی پولس نے سخت حفاظتی انتظامات کا اعلان کیا ہے ، مگر اُس سے پہلے ہی کیرالہ کی ایک بس پر پتھرائو کی واردات پیش آئی ہے۔ ذرائع سے ملی اطلاع کے مطابق مینگلور کے قریب کیرالہ بارڈر تلپاڈی میں کیرالہ کی ایک سرکاری بس پر شرپسندوں نے پتھرائو کرتے ہوئے بس کا اگلا شیشہ توڑ دیا ہے۔ بتایا گیا ہے کہ بس پر چار یا پانچ ہی مسافر تھے، جس کی بنا پر کسی کے زخمی ہونے کی اطلاع نہیں ہے۔

خیال رہے کہ کل 25 فروری صبح ریاست کیرالہ کے وزیراعلیٰ مینگلور پہنچ رہے ہیں، جس کی مخالفت کرتے ہوئے کل بی جے پی اور سنگھ پریوار کے تنظیموں نے بند کا اعلان کیا ہے ۔ اُدھر پولس نے وزیراعلیٰ کی آمد کو دیکھتے ہوئے پولس کے تگڑے انتظامات کرنے کی بات  کہی ہے اور انتباہ دیا ہے کہ شرپسندوں کو قانون اپنے ہاتھ میں لینے کی اجازت نہیں دی جائے گی۔ پولس نے اس بات کی بھی اطلاع دی ہے کہ شدت پسند کارکنوں کی شرارت کے خدشہ کو دیکھتے ہوئے جگہ جگہ سی سی ٹی وی کیمرے نصب کئے گئے ہیں۔