سرسی:14؍نومبر (ایس او نیوز) ندی میں تیرنے کے دوران  ڈوبنے والے  دو  دوستوں کو بچانے میں کامیاب ہونے کے بعد خود موت کا شکار ہو نے والے  سرسی کے   ہیمنت ایس ایم نامی لڑکے کو  کرناٹکا حکومت نے ’ہوئیسلا‘ایوارڈ سے نوازے جانے کا اعلان کیا ہے۔

14نومبر کو منائے جانے والے یوم ِ اطفال کے موقع پر ریاستی حکومت کی طرف سے مختلف جری و بیباک بچوں کو بہادری کے ایوارڈ ’ہوئیسلا‘سے نوازاجاتاہے۔ حکومت کی طرف سے بہادر بچوں کی فہرست میں سرسی کے متوفی بچے ہیمنت کا نام بھی شامل ہے۔

2اکتوبر 2017گاندھی جینتی کے موقع پر ہیمنت  اپنے 5دوستوں کے ساتھ  سرسی تعلقہ کے وانلی گاؤں کی ندی میں  تیررہا تھا کہ اچانک  تین دوست ڈوبنے لگے اُس موقع پر  ہیمنت نے بڑی بہادری کا مظاہرہ کرتے ہوئے اپنے 2دوستوں کو بچالیا ،  مگروہ تیسرے کو بچانے کی کوشش  میں موت کا شکار ہوگیا۔ اس وقت وانلی میں مقیم یہ خاندان اب بھاسکر سرکل پر رہائش پذیر ہے۔ مخکمہ خواتین واطفال فلاح وبہبودی کی جانب سے خاندان والوں کو  تحریری طور پر اس بات کی اطلاع دی گئی ہے اُن کے بہادر بیٹے کو ایوارڈ سے نوازا جارہا ہے۔ ہیمنت کی ماں  چنما کرافٹ ٹیچر ہیں تو باپ بڑھئی کا کام کرتےہیں۔ ان کا ایک اور بیٹا شرتھ ایم بی ایس سی میں زیر تعلیم ہے۔

والدہ چنما نے متوفی بیٹے کو یاد کرتے ہوئے اشک بھرے آنکھوں سے کہاکہ میرابیٹا ہیمنت ہونہار اور کھیل  میں اول تھا۔ باپ نے بھی اپنے بیٹے کی ذہانت کے متعلق بتاتے  ہوئے آنسو بہائے۔ ایوارڈ ملنے پر باپ نے کہاکہ ایوارڈ پروگرام بنگلورو میں ہوگا۔ انہوں نے کہا کہ ہمارے لئے  بنگلورو نئی جگہ ہے، اور ہم پہلی مرتبہ جارہے ہیں انہوں نے اس سلسلے میں افسران کی تعاون کرنے کی درخواست کی۔