سرسی میں تیز رفتار بائک چلانے اور بغیر لائسنس بائک چلانے پر پولس محکمہ کی کارروائی، کئی کالج طلبا پر جرمانہ
سرسی:23/فروری (ایس او نیوز) بغیر لائسنس بائیک چلانے، بغیر ہیلمیٹ بائک چلانے، تیز رفتاری کے ساتھ گاڑی چلانے اور آوارہ گردی کرنے والے کئی طلبا کو محکمہ پولس نے بدھ کو زبردست جھٹکا دیتے ہوئے کئی ایک پر جرمانہ عائد کیا ہے۔
بدھ کوسرسی کے کالج روڈ پر اچانک چیکنگ شروع کرتے ہوئے پولس نے جب گاڑیاں روکنی شروع کردی تو بغیر لائسنس ، بغیر انشورنس پیپرس اور بغیر گاڑی کے دستاویزات بائک چلانے والے طلبا کی کافی تعداد نکل آئی۔
موصولہ اطلاعات کے مطابق مارکیٹ پولس تھانہ پی ایس آئی اور دیگر اعلیٰ افسران نے بائک سواروں کی جانچ کرتے ہوئے جرمانہ عائد کیا ۔ ذرائع سے ملی اطلاع کے مطابق حالیہ دنوں میں نوجوانوں کا بہت زیادہ تیز رفتاری سے اندھا دھند بائک سواری کرنا عام ہوتاجارہا تھا، عوامی سطح پر نوجوانوں کی حرکات سے خوف کااظہار کرتے ہوئے مطالبہ کیا جارہاتھاکہ محکمہ پولس ایسے نوجوانوں کا پتہ لگاکر انہیں سمجھائے، اسی طرح یہ الزام بھی لگایاجارہا تھا کہ کچھ نوجوان شراب اور گانجہ وغیرہ پی کر بائک سواری کررہے ہیں عوامی شکایات پر کاروائی کرتے ہوئے پولس نے اچانک گاڑیوں کی چیکنگ شروع کردی تھی۔
