ہبلی 12؍فروری (ایس او نیوز)شہر کے ایئر پورٹ پر عملے کے لئے ایک ناکام عاشق کی جانب سے کیے جارہے مسلسل دھمکی آمیز فون کالس دردسر بن گئے ہیں اور مسافروں کے تحفظ کے لئے بھی بڑا مسئلہ بن گئے ہیں۔

کہاجاتا ہے کہ روئے ڈایاز(۲۶سال) نامی ایک نوجوان مختلف انٹر نیٹ نمبروں سے مسلسل دھمکی آمیز فون کال کیا کرتا ہے۔ صرف انتظامی عملے کے نمبروں پر ہی نہیں بلکہ ایئر ٹریفک کنٹرول سے جڑے ہوئے افسران کو بھی اب تک وہ ہزاروں کال کرچکا ہے۔حالانکہ ایئر پورٹ کے افسران نے سائبر کرائم اور گوکل روڈ پولیس اسٹیشن میں شکایت درج کروائی، مگر اس کا کوئی فائد ہ نہیں ہوا ہے اور ایئر پورٹ افسران کو اس نوجوان کی طرف سے کی جارہی ہراسانی سے نجات نہیں ملی ہے۔

اس مسئلے کے پیچھے اصل کہانی یہ بتائی جاتی ہے کہ دھارواڑ کے رہنے والی ایک لڑکی گوا کے ڈابولیم ہوائی اڈے پر ملازمت کررہی تھی۔ روئے ڈایاز نامی اس شخص کے ساتھ لڑکی کا معاشقہ چل پڑا۔ پھر کچھ عرصے بعد کسی وجہ سے ان دونوں کامعاشقہ ٹوٹ گیا اور لڑکی نے اپنا تبادلہ ہبلی ایئر پورٹ پر کروالیا۔ دوسری طرف ڈایاز دبئی چلا گیا اور وہاں سے اس نے انٹر نیٹ نمبر پر ایئر پورٹ اسٹاف کو دھمکیاں دینے اور ہراساں کرنے کا سلسلہ شروع کر رکھا ہے۔

ذرائع سے ملی اطلاع کے مطابق عین کسی جہاز کے لینڈنگ کے موقع پر بھی کئی بار ڈایاز کے دھمکی آمیز فون کالس موصول ہوئے ہیں جس سے انتظامی اور تحفظاتی دشواریاں پید اہوئی ہیں۔مسلسل ٹیلی فون کالس سے پریشان عملے اور افسران کا کہنا ہے کہ چونکہ اس ایئر پورٹ پر اکثر وبیشتر بہت ہی زیادہ اہم ترین شخصیات (وی وی آئی پی) کا آنا جانا رہتا ہے اس لئے دھمکیوں اور ہراسانی کے اس مسئلے کو جتنی جلد حل کردیا جائے گا اتناہی بہتر ہوگا۔ مزید تاخیر کسی بھی ناخوشگوار واقعے کا سبب بن سکتی ہے۔