پتور 11؍مارچ(ایس او نیوز) قسمت کا حال بتانے اور مسائل حل کرنے کے نام پر ایک نجومی نے نابالغ لڑکی کی عصمت دری کرڈالی جس کے بعدلڑکی کے والدین کی شکایت پر پولیس نے اس نجومی کو گرفتار کرلیا ہے۔

موصولہ رپورٹ کے مطابق  پتور کے بانّور نیکلا نامی مقام پر بالچندرا اچاریہ نامی ایک ۳۴ سالہ نجومی قسمت کا حال بتانے اور درپیش مسائل کو حل کرنے کا دعویٰ کیا کرتاتھا۔ زندگی میں کچھ مشکلات کا سامنا ہونے کی وجہ سے اس گاؤں کے ایک گھر والوں نے بالچندرا سے ملاقات کی۔ میاں بیوی کے ساتھ ان کی ایک نابالغ بچی بھی تھی۔ کچھ دیر تک بالچندرا اچاریہ نے ان کی قسمت کا حال بتاتے ہوئے ان کے پوچھے گئے سوالات کا جواب دیا۔ پھر ان سے کہا کہ بچی پر جو بھوت پریت کے اثرات ہیں ان سے چھٹکارا دلانے کے لئے اسے تنہا اپنے کمرے میں لے جانا ہوگا اس لئے وہ دونوں باہر ہی انتظار کریں۔ کچھ دیر بعد لڑکی باہر آئی تو اس نے والدین کو بتایا کہ نجومی نے اس کی آبرو ریزی کی ہے۔

متاثرہ لڑکی کے والدین نے پولیس اسٹیشن میں اس تعلق سے شکایت درج کروائی تو پولیس نے کارروائی کرتے ہوئے بالچندرا اچاریہ کو ’پوکسوایکٹ‘ کے تحت گرفتارکرلیا۔ جسے بعد میں عدالتی حراست میں بھیج دیاگیا ہے۔