بھٹکل کوگؤ ہتھیا سے نجات دلانے کے لئے عوام تعاون کریں:راگھویشور سوامی
بھٹکل 21؍جنوری (ایس او نیوز) گؤ رکھشا کی مہم چلانے والے راگھویشور بھارتی سوامی نے ایک خطاب کے دوران کہا کہ اگر عوام تعاون کریں تو بھٹکل کو گؤ ہتھیا سے پاک تعلقہ میں بدلا جاسکتا ہے۔
راگھویشور سوامی نے شیرالی جنتا ودیالیہ کے میدان میں گؤ یاترا اور سوربی سنت سنگم پروگرام میں خطاب کرتے ہوئے ان خیالات کااظہار کیا۔ہندوستانی گائے کی اہمیت کے پیش نظر اسے پالنا پوسنا اور اس کی حفاظت کرنا ہر ایک شہری کی ذمہ داری ہے۔گائے سے ملنے والے فوائد سے اگر زیادہ سے زیادہ آمدنی اور کمائی مقصود ہوتو پھر گائے کو قصائیوں کے ہاتھوں فروخت کرنے کاسوال ہی پیدا نہیں ہوتا۔انہوں نے کہا کہ بھٹکل کی پیشانی پر لگے ہوئے داغ دھونے ہونگے۔ یہاں کسی بھی قسم کے فساد ، جھگڑے اور دنگے کے بغیر گؤ کشی سے پاک ماحول فراہم کرنے کا منصوبہ بنایا جانا چاہیے۔اس سلسلے میں بیداری لانے کی مہم چلائی گئی تو آئندہ دنوں میں بھٹکل گؤ ہتھیا سے مکت تعلقہ قرار پانے میں کوئی شک نہیں ہے۔
سوامی نے کہا کہ بھٹکل میں 'گائے بینک'بنانے کی ضرورت ہے اس کے لئے مقامی باشندوں کا تعاون انتہائی ضروری ہے۔اس لئے کہ ذبح کرنے کے لئے جب گائے فروخت کرنے والے ہی نہیں ہونگے تو پھر کوئی گائے کی ہتھیا کیسے کر پائے گا۔انہوں نے کہا کہ جن لوگوں کے لئے گھروں میں گائے پالنا ممکن نہیں ہے انہیں چاہیے کہ گؤ شالہ میں پل رہی ایک گائے کو گود لینے کا کام کریں۔گائے سے ملنے والی اشیاء کو خریدنے سے گائے کی حفاظت بھی ہوتی ہے اور کسانوں کو مالی فائدہ بھی پہنچتا ہے۔انہوں نے گؤ مالا کے ضمن میں ریاستی حکومت کی پالیسی کی بھی مذمت کی۔