کاروار میں جہیز ہراسانی سے تنگ آکر گھریلوحاملہ خاتون کی خود کشی
کاروار31/اگست (ایس او نیوز)یہاں سے قریب کڈواڈ نامی علاقے میں ایک گھریلو خاتون نے سسرال والوں کی طرف سے جہیز ہراسانی سے تنگ آکر خود کشی کی کوشش کی جسے بعد میں اسپتال میں داخل تو کیا گیا مگر علاج کارگر نہ ہونے سے اس کی موت واقع ہوگئی۔فوت ہونے والی حاملہ خاتون کا نام سشما گوویکر بتایا جاتا ہے۔
کہا جاتا ہے کہ جہیز کے معاملے پرسسرال والوں کی طر ف سے مسلسل ہراسانی سے تنگ آکر سشما نے خود کشی کی کوشش کی۔ اسے نازک حالت میں علاج کے لئے گوا کے اپولو اسپتال میں منتقل کیا گیا تھا۔مگر ایک دن بعد اسپتال میں ہی اس کی موت واقع ہوگئی۔ سشما کہ بہن سجاتا نے پولیس میں سشما کے سسرال والوں کے خلاف جہیز کے لئے ہراساں کرنے کی شکایت درج کروائی ہے اور اسی وجہ سے سشما کے موت واقع ہونے کی بات کہی ہے۔سشما کی شادی ۲ سال قبل کوڈی بھاگ علاقے کے راجن کے ساتھ ہوئی تھی۔ اس کی چھ مہینے کی ایک بیٹی ہے اور اس وقت وہ دو ماہ کی حاملہ تھی۔
سشما کی موت کی خبر ملنے پر علاقے کے لوگوں نے سشماکے سسرال والوں کی گرفتاری کا مطالبہ کرتے ہوئے کاروار ٹاون پولیس اسٹیشن کے سامنے احتجاج کیا۔پولیس معاملہ کرنے کے بعد تحقیقات کررہی ہے۔