نیشنل ہائی وے توسیع کے مسئلے پر شیرالی میں گرام پنچایت کا خصوصی اجلاس۔ عوامی مطالبہ پورانہ ہونے پر احتجاج کی دھمکی
بھٹکل 18؍ستمبر (ایس او نیوز) نیشنل ہائی وے کی توسیع کے سلسلے میں شیرالی میں عوام کے مسائل پر غور وخوص کے لئے گرام پنچایت کا ایک خصوصی اجلاس ماروتی مندر کے ہا ل میں منعقد کیا گیا۔
گرام پنچایت صدر وینکٹیش نائک نے اجلاس کی صدارت کرتے ہوئے کہا کہ شیرالی کے امن پسند شہریوں نے نیشنل ہائی وے کی منصفانہ توسیع کے لئے بھرپورتعاون کیا ہے۔آئندہ کی ضروریات اور تقاضوں کو سامنے رکھ کر یہاں پر ہائی وے کو 45میٹر چوڑا کرنے کے لئے اب تک عوام کی طرف سے اصرار کیا جارہا ہے۔ اگر اس پر توجہ نہیں دی گئی اور اس مطالبے کو پورا نہیں کیا گیا تو پھر آنے والے دنوں میں زبردست احتجاجی مظاہرے کرنے کے سوا دوسرا کوئی راستہ باقی نہیں رہے گا۔ انہوں نے کہا کہ پہلے سے طے شدہ منصوبے کے مطابق یہاں پر سڑک کی توسیع 45میٹر ہونی تھی، مگر اچانک اس میں تبدیلی کرتے ہوئے 30 میٹر کی توسیع کا منصوبہ بنایا گیا ہے۔ اس کے خلاف ڈپٹی کمشنر سے ملاقات کرکے میمورنڈم بھی دیا گیا، لیکن اس کا کوئی فائدہ نہیں ہوا۔اس لئے اب افسران کو ہم ایک مہینے کی مہلت دیتے ہیں، اگر اس مہلت کے اندر 45میٹر کی توسیع کا فیصلہ نہیں کیاگیا تو پھر شیرالی گرام پنچایت کے تمام اراکین مستعفی ہوکر راستوں پر اتر آئیں گے۔
اجلاس میں شریک شہریوں نے اس میٹنگ میں تحصیلدار اوراسسٹنٹ کمشنر کی غیر حاضری پر اپنی ناراضی جتائی۔ہائی وے افسران کی طرف سے توسیع کے سلسلے میں کی جارہی آنا کانی پر بھی حاضرین نے برہمی کااظہار کیا۔حاضرین نے کہا کہ افسران اورہائی وے اتھاریٹی کے ذمہ داران شیرالی میں کی جارہی توسیع کے سلسلے میں واضح طور پر بتائے بغیر کام آگے بڑھا رہے ہیں۔
اس موقع پرنیشنل ہائی وے اتھاریٹی آف انڈیا کے افسر نوین کمار نے عوام کو بتایا کہ شیرالی میں نیشنل ہائی وے کو 30میٹر چوڑا کیا جارہا ہے جس میں 7.5میٹر ہائی وے کے لئے،3.5میٹر سروس روڈ،1.5میٹر فٹ پاتھ اور 2.5میٹر گندے اور برساتی پانی کی نکاسی کے لئے (چرنڈی)مختص کیا گیا ہے۔ اس پر عوام نے سوال کیا کہ تو پھر یہاں کے ٹیمپو اور رکشہ کہاں کھڑے کیے جائیں گے؟پہلے کیے گئے سروے کے مطابق یہاں 45میٹر کی توسیع ہونی تھی، مگر یہاں کے مقامی عوام کو اطلاع دئے بغیر اچانک 30میٹر کا فیصلہ کیوں کیا گیا؟ اس کے ساتھ ہی اجلاس میں گرما گرم بحث شروع ہوگئی۔
سابق فوجی ناگیش پھکّی نے عوام کی طرف سے بات کرتے ہوئے کہا کہ شیرالی میں سڑک کی توسیع کے سلسلے میں پیدا ہونے والے مسائل کے لئے یہاں کے افسران ہی ذمہ دار ہیں۔ حکومت کوحقائق پر مبنی معلومات فراہم نہ کرنے کی وجہ سے اس طرح کی پیچیدگی پیدا ہوگئی ہے۔