منگلورو میں عالمی سطح کا آنکھوں کا نیا اسپتال ’’ڈیلٹا آئی کئیر‘‘ کا یوٹی قادر کے ہاتھوں شاندار افتتاح
منگلورو:19/مارچ (ایس او نیوز) بھٹکل بندر روڈ پر ڈیلٹاآئی کئیر اسپتال کی شاندار کامیابی کے بعد اب مینگلور شہر کے بیندورویل کے مین روڈ پر واقع پرانے واسن آئی کئیر اسپتال کی عمارت میں ایک نیا آنکھوں کااسپتال ’’ڈیلٹا ائی کیئر اسپتال‘‘ قائم کیا گیا ہے، جس کا اتوار کو شاندار افتتاح ہوا۔ اس موقع پر ریاستی کابینہ کے وزیر یوٹی قادر نے اسپتال کا افتتاح کیا تو ، رکن اسمبلی جے آر لوبو نے اسپتال کے صحن میں موجود آپٹیکلس کا افتتاح کیا، اسی طرح مشہور ڈاکٹر ایم شانتا رام شٹی نے آپریشن تھیٹر کا اور منگلورو مہانگرپالیکا ممبر نوین ڈیسوزا نے ڈیلٹا میڈیکلس کا افتتاح کیا۔
افتتاح کے بعد خطاب کرتے ہوئے یوٹی قادر نے کہا کہ طبی میدان میں سماجی فکر لازمی طورپر ہونی چاہئے، اسپتال پہنچنے والے مریضوں کے ساتھ انسانی ہمدردی کا رویہ اختیار کرتے ہوئے کم سے کم خرچ پر بہترین خدمات فراہم کی دینی چاہئے ، ایسا کریں گے تو ہم عوام کے پیار و محبت اور اعتماد کے لائق بنیں گے۔ اسی طرح انہوں نے ڈیلٹا آئی کئیر اسپتال والوں سے اپیل کی کہ شہر کے لیڈی گوشن اسپتال میں جہاں روزانہ سیکڑوں زچگیاں ہوتی ہیں، ڈیلٹا والے وہاں کے نوزائد ہ بچوں کی آنکھوں کی جانچ مفت کرنے کے تعلق سے سوچیں ۔ ساتھ ہی انہوں نے ادارے کے ذمہ داروں سے اس بات کی بھی اپیل کی کہ وہ اپنے ادارے کی جانبسے آپٹیکل ڈپلوما کالج قائم کرنے کا منصوبہ بنائیں، اگر آپ اس سمت کچھ سوچتے ہیں تو سرکارکی طرف سے ہم بھی ہر طرح سے تعاون کرنے تیار ہیں۔
رکن اسمبلی جے آر لوبو، ڈاکٹر ایم شانتا رام شٹی ، مالاڑی اجیت کمار رائی نے بھی اس موقع پر اپنے اپنے تاثرات پیش کئے ۔ ڈیلٹا ہیلتھ فاؤنڈیشن کے صدر ڈاکٹر بھرت کمار نے پروگرام کی صدارت کی۔ ادارے کے ڈائرکٹر عبدالحمید، کے ایم سجاد، شہنواز مراد، محمد ایاز، اسپتال کے ڈاکٹر وسنت پائی ، ڈاکٹر انوپما کارنت، ڈاکٹر پراجکتا کلکرنی ، ڈاکٹر سدھیندراوغیرہ موجود تھے۔ اسپتال کے انتظامیہ افسر بی اے محمد علی نے استقبال کیا تو عمریوایچ نے شکریہ اداکیا۔
اس موقع پر ڈیلٹا آئی کئیر اسپتال کے ڈائرکٹر عبدالحمید نے اخبار نویسوں کو بتایا کہ ڈیلٹا میں کم قیمت پر عالمی درجہ کا علاج کرایا جائے گا۔ انہوں نے کہا کہ ماہرڈاکٹروں کی ٹیم ، بہترین لیباریٹری ، جانچ مرکز، عورتوں اور بچوں کے لئے الگ شعبہ جات ، جدیدتکنیک سے آراستہ آپریشن شعبہ، بہترین عملہ کی خدمات ڈیلٹا کی خصوصیات میں شامل ہیں۔ ملک اور بیرونی ممالک کے مشہور و معروف برانڈ کے فریم، لینس، کانٹیاکٹ لنس ڈیلٹا آپٹکلس میں دستیاب ہیں ۔ اسپتال کے انتظامیہ آفیسر بی اے محمد علی نے بتایا کہ افتتاحی رعایت کے طورپر 19مارچ سے 19اپریل تک ارکان اسمبلی یوٹی قادر اور جے آر لوبو کی سفارش لے کر جو بھی غریب مریض ڈیلٹا میں آئے گا اُن کی مفت میں آنکھوں کی جانچ کی جائے گی، اسی طرح مفت چشمہ بھی دیا جائے گا، جبکہ رکن اسمبلی کے توسط سے آنے والوں کو ابتدائی ایک ماہ تک علاج پر 10%رعایت دی جائے گی۔
