بھٹکل میں بزمِ فیض الرسول کے زیراہتمام میلاد النبی ؐ کا شاندار جلوس
بھٹکل:یکم دسمبر(ایس اؤنیوز) گذشتہ سالوں کی طرح امسال بھی 12 ربیع الاول کی مناسبت سے بزمِ فیض الرسول کے زیراہتمام شہر میں میلاد النبی ﷺ کا جلوس نکالاگیا جس میں بڑے چھوٹے کافی لوگوں نے حصہ لیا۔ شروعات میں پیدل جلوس تھا تو بعد میں بائک اور دیگر سواریوں کی قطار لگی ہوئی تھی۔
شہر کے عیدگاہ میدان سے نکلا ہوا جلوس شمس الدین سرکل ، اولڈ بس اسٹانڈ اور سلطان اسٹریٹ سے چوک بازار میں گھوم کر مین روڈ ہوتے ہوئے پبلک چبوترے پر اختتام پذیر ہوا۔ جلوس میں کچھ نوجوان دف بجاتے ہوئے اور نعرہ تکبیر اللہ اکبر کی صدا لگاتے ہوئے نظر آئے تو مائک پر نعت شریف نیز درود شریف بج رہے تھے،جس کی سماعت کرتے ہوئے دیگر لوگ جلوس کے ساتھ آگے بڑھ رہے تھے۔
ادارہ بزم فیض الرسول کے صدر سید منظر حُسین انکولہ، جنرل سکریٹری فہیم محتشم (روڈا)، نائب صدر ناگرمٹ جفری، مستان چڈوباپا ، مولانا فیضان رضا محتشم، ادریس محتشم، کے ایم اشرف ، مولانا احمد جفری اکرمی، ابوہریرہ اکرمی، رئیس اکرمی سمیت مختلف شخصیات جلوس میں شریک تھیں۔
سڑک کے کنارے کھڑے ہوکر جلوس کو دیکھنے کے لئے بھی کافی لوگ اُمڈ پڑے تھے۔ بالخصوصاولڈ بس اسٹائنڈ اور سلطان اسٹریٹ میں جلوس کو دیکھنے کے لئے سینکڑوں کی تعداد بھی لوگ موجود تھے جس میں بہت ساری خواتین بھی اپنے بچوں کے ساتھ جلوس کا نظارہ کرنے پہنچی تھی۔