مینگلور سے دبئی جانے والی اسپائس جیٹ کی پائلٹ شراب کے نشے میں دھت ؛ فلائٹ کو 5 گھنٹوں تک روکنا پڑا
منگلورو،18؍جنوری (ایس او نیوز)منگلورو انٹرنیشنل ایئرپورٹ سے دبئی کے لئے اڑان بھرنے والی اسپائس جیٹ فلائٹ کو 5گھنٹے روکے رکھنا پڑا کیونکہ اس طیارے کی خاتون پائلٹ نشے میں بری طرح دھت پائی گئی تھی۔
بتایا گیا ہے کہ اسپائس جیٹ کا مذکورہ طیارہ ترکی کی Corendon Airlinesسے لیز پر لیا گیا ہے اور اس کے پائلٹ سمیت تمام اسٹاف ترکی کے باشندے ہیں۔ اس خاتون پائلٹ کے بارے میں معلوم ہوا ہے کہ اس نے منگلورو شہر میں رہائش اختیار کررکھی ہے۔180مسافروں کو لے کر رات کے 12.40بجے اس طیارے کو اڑان بھرنا تھا۔ مسافر تمام ضروری کارروائیاں مکمل کرکے بورڈنگ کے لئے تیار بیٹھے تھے ۔لیکن دوسری طرف معمول کے مطابق اڑان بھرنے سے دو گھنٹے پہلے 35سالہ خاتون پائلٹ کا طبی معائنہ ہواتو اس وقت ایئر پورٹ کے میڈیکل افیسرکو پتہ چلا کہ وہ بری طرح نشے میں مست ہے اور اسے اپنے آپ کو قابو میں رکھنا مشکل ہورہا ہے۔تب ایئر پورٹ اسٹاف نے فوری طور پر طیارے کی اڑان کا وقت منسوخ کردیا اور پائلٹ کے خلاف ضروری کارروائی شروع کی۔ ذرائع کا کہنا ہے کہ اس پائلٹ کو تحقیقات مکمل ہونے اور قطعی نتیجہ سامنے آنے تک کسی بھی طیارے کو اڑانے کی اجازت نہیں دی جائے گی۔
ذرائع نے بتایا کہ فلائٹ کو روکے رکھنے کے پہلے مرحلے میں مسافر وں کو بتایا گیا کہ تیکنکی خرابی کی وجہ سے تاخیر ہورہی ہے، آدھی رات سے صبح تک مسافر بہت پریشان تھے اور برہمی کا اظہار کررہے تھے۔ مگر پانچ گھنٹے کی تاخیر کے بعد جب صبح 6بجے متبادل پائلٹ کا انتظام کیاگیا اور اصل صورتحال مسافروں کو معلوم ہوئی تو سب کا غصہ کافور ہوگیا اور انہوں نے راحت کی سانس لیتے ہوئے خدا کا شکر ادا کیا کہ وہ سب ایک ان دیکھی ٹریجڈی سے دوچار ہوتے ہوتے رہ گئے۔