پٹرول کی قیمتوں میں اضافے کے خلاف منگلورومیں ہوگا10 ستمبر کو 28تنظیموں کا مشترکہ احتجاجی مارچ
منگلورو 8؍ستمبر (ایس او نیوز) پٹرول اور ڈیزل کے بڑھتی قیمتوں کے خلاف ایم ایل سی ایوان ڈیسوزا کی قیادت میں 10ستمبر کومنگلورو میں ہمپن کٹا سرکل سے ڈپٹی کمشنر آفس تک احتجاجی مارچ کا اہتمام کیا جائے گا۔جس میں تقریباً 28تنظیموں کی شرکت کا اعلان کیا گیا ہے۔
پریس کانفرنس سے خطاب کرتے ہوئے ایوان ڈیسوزا نے کہا کہ پٹرول کی قیمتیں لگاتار بڑھتی جارہی ہیں اور اب یہ قیمت فی لیٹر80روپے سے آگے نکل گئی ہے، جبکہ بین الاقوامی مارکیٹ میں کچے تیل کی قیمت کم ہوگئی ہے۔2014 ء میں 108.26امریکی ڈالر فی بیرل کے وقت پٹرول کی قیمت65روپے فی لیٹر تھی۔ جبکہ اس کے مقابلے میں کچے تیل کی قیمت 2018 میں 65امریکی ڈالر فی بیرل ہوگئی ہے، اور پٹرول 81روپے فی لیٹر سے آگے نکل گیا ہے۔یہی حال ڈیزل کی قیمتوں کا بھی ہے۔
انہوں نے کہا کہ پٹرول اور ڈیزل کی قیمتوں میں مسلسل اضافے کی وجہ سے عام آدمی کی زندگی بری طرح متاثر ہوئی ہے۔اس لئے 28تنظیموں کے اشتراک سے احتجاجی مظاہرے کا اہتمام کیا گیا ہے۔احتجاجی مظاہرے سے قبل دو دنوں تک پٹرول کی بڑھتی قیمتوں کے سلسلے میں عوام کے اندر بیداری لانے کے لئے مختلف مقامات پر پروگرام منعقد کیے جائیں گے۔