منگلورو: پرائیویٹ تعلیمی ادارے طلبا کی اصل تعلیمی دستاویزات نہ لوٹائے تو کریمنل کیس :ڈی سی کا انتباہ
منگلورو:28/ستمبر (ایس اؤنیوز)ضلع کے پرائیویٹ تعلیمی ادارے داخلےکے دوران طلبا سےحاصل کئے گئے تمام اصل دستاویزات فوری طورپر واپس کریں، کوئی تعلیمی ادارہ ایسا نہیں کرتاہے تو اس کے خلاف کریمنل مقدمہ دائر کئے جانے کاڈپٹی کمشنر ڈاکٹر کے جی جگدیش نے انتباہ دیا۔
جمعرات کو ڈی سی دفتر میں تحفظ حقوق اطفال کمیشن ریاست کرناٹکا کی صدر کرپا آلوا کی صدار ت میں منعقدہ میٹنگ میں ڈی سی خطاب کررہے تھے۔ ڈی سی نے کہاکہ اصول و ضوابط کے مطابق طلبا کے مارکس کارڈسمیت داخلے کے دوران لئے گئے تمام تعلیمی دستاویزات کو تعلیمی ادارے اپنے پاس نہیں رکھ سکتے۔ لیکن کچھ تعلیمی ادارے طلبا کو فیس کے متعلق ہراساں کررہے ہیں، طلبا اگر تعلیم درمیان میں چھوڑ دیتے ہیں یا اس ادارے سے نکل جاتےہیں تو طلبا کو پورے سال کی فیس بھرنے کے لئے تعلیمی ادارے ستایا کرتے ہیں، یہ غیر قانونی ہونے کی ڈی سی نے جانکاری دی ۔
تعلیمی ادارے داخلے کے دوران حاصل کردہ اصل تعلیمی دستاویزات کو ایک ماہ کے اندر لوٹاناہے، اس تعلق سے تمام پرائیویٹ تعلیمی اداروں کو نوٹس ارسال کرنے کے بعد متعلقہ ہرایک اسکول ،کالج کا دورہ کرتے ہوئے جانچ کی جائے گی۔ اگر اس دوران کسی تعلیمی ادارے میں طلبا کی اوریجنل دستاویزات پائے گئے تو ان کے خلاف کریمنل کیس دائر کرنے ہدایات دیں۔
ریاستی تحفظ حقوق اطفال کمیشن کی صدر کرپا آلوا نے صدارتی خطاب کرتے ہوئے کہاکہ ضلع کے تمام خانگی تعلیمی اداروں اور ہاسٹلوں میں طلبا دوست ماحول پیدا کرنے ضلع انتظامیہ کو اقدامات کرنے کہا۔ ہاسٹلوں میں متعلقہ انتظامیہ کی طرف سے مہیا کی گئیں بنیادی سہولیات کا وقتاً فوقتاً معائنہ کرنے کی ہدایات دیں۔ میٹنگ میں پولس کمشنر ٹی آر سریش ، کمیشن کے ممبر آنند لوبو، ضلع پنچایت معاون سکریٹری این آر امیش، محکمہ اطفال و خواتین کے نائب ڈائرکٹر سندر پجاری ، ڈی ڈی پی آئی شیو رامیا ، پی یو کالج ڈپوٹی ڈائرکٹر تمیا وغیرہ موجود تھے۔
