مینگلور کے قریب پُتور میں اشتعال انگیز بیان دینے والے جگدیش کارنت کو ملی عبوری ضمانت
مینگلور 30؍ستمبر(ایس او نیوز) ہندو جاگرن ویدیکے کے کنوینر جگدیش کارنت کو اشتعال انگیز تقریر اور پولیس انسپکٹر قادر کے خلاف ذلت آمیز بیان دینے کے لئے بنگلورو ایئر پورٹ سے جمعہ کی دوپہر گرفتار کرلیا گیا تھا، جسے رات قریب ڈیڑھ بجے عبوری ضمانت پر رہا کردیا گیا ہے۔
ذرئع سے ملی اطلاع کے مطابق کارنت کو جمعہ کی دوپہر قریب 1:30 بجے بنگلور ائرپورٹ سے گرفتار کیا گیا تھا، اسے رات قریب 11:30بجے پُتور پولس تھانہ لایا گیا، جہاں سے رات کو ہی پتور عدالت میں پیش کیا گیا۔ رات قریب ڈیڑھ بجے کارنت کے وکیل نے ضمانت کی عرضی دی، جس پر معزز جج صاحب نے کچھ شرائط کے ساتھ منظوری دے دی۔
خیال رہے کہ اس کی گرفتاری کے خلاف پتور میں سنگھ پریوار کی طرف سے شدیداحتجاجی مظاہرہ بھی کیا گیا تھا، جبکہ عدالت میں پیشی کے دوران سنگھ پریوار کے کافی کارکن جج کے عدالت کے باہر جمع ہوگئے تھے۔ پولس نے پہلے ہی پیشگی اقدامات کے طور پر پولس کا سخت بندوبست کیا تھا۔
بتایا گیا ہے کہ اشتعال انگیز بیان دینے والے جگدیش کارنت کی گرفتاری کے بعد پتور میں دو، ایک بسوں پر پتھرائو کی بھی خبر ملی تھی۔