منگلورو 28؍مارچ (ایس او نیوز)کچھ عرصے تک ذرا سی خاموشی کے بعد ایسا لگتا ہے کہ انڈرورلڈ والوں نے پھر سے منگلورو میں ہفتہ وصولی کا سلسلہ شروع کردیا ہے۔ موصولہ رپورٹ کے مطابق یہاں پرمشہور پولٹری فارم کے منیجنگ پارٹنر ڈاکٹر ارون کمار رائے کو مبینہ طور پر انڈر ورلڈ سے فون کال موصول ہوا ہے کہ وہ 50لاکھ روپے ہفتہ وصولی کے طور پر ادا کریں۔

اس ضمن میں کنکن ناڈی پولیس اسٹیشن میں کیس درج کیا گیا ہے، جس میں ڈاکٹر ارون کمار نے بتایا ہے کہ مبینہ طور پر انڈر ورلڈ ڈان کالی یوگیش کے نام سے انہیں انٹرنیٹ فون موصول ہوا تھا۔جب انہوں نے رقم ادا کرنے سے انکار کیا تو اس نے دھمکی دی ہے کہ وہ اپنے گُرگوں کو بھیج کر انہیں جان سے مارڈالے گا۔خیال رہے کہ اس سے قبل کالی یوگیش نے بنٹوال میں ایک کپڑوں کے تاجر کو بھی اسی طرح دھمکی آمیز کال کی تھی اور کنڑا رکھشنا ویدیکے کے ڈسٹرکٹ صدر انیل داس کا بھی کہنا تھا کہ انہیں بھی دھمکی آمیز فون کیا گیا تھا۔

گزشتہ سال ۸ دسمبر کوکالی یوگیش کے غنڈوں نے منگلورو کار اسٹریٹ پر واقع ایم سنجیوا سلکس اینڈ ساریس نامی دکان پر فائرنگ کی تھی جس میں دکان کے ایک ملازم کے پیر میں گولی لگی تھی۔ جبکہ اسی سال ۲۳دسمبر کو یوگیش گینگ کے غنڈوں نے موُلکی میں ایک تاجر کو نشانہ بنایاتھا۔اور اس کے گھر کے کمپاونڈ میں گھس کر گولیاں چلانے کے بعد فرار ہوگئے تھے۔حالانکہ اس تاجر کے گھروالوں میں سے کسی کو چوٹ نہیںآئی تھی، لیکن اس کے گھر کے داخلی دروازے اور کمپاونڈ میں کھڑی کار کے بونیٹ کو کافی نقصان پہنچا تھا۔