منگلورو:20/جولائی (ایس اؤنیوز)اپنے وجود کو باقی رکھنے اور بنیاد کو مستحکم بنانے کےلئے رکن پارلیمان شوبھا کرندلاجے بے تکے بیانا ت جاری کررہی ہیں، اس بات کا الزام ریاستی کابینہ کے وزیر غذائی سپلائی یو ٹی قادر نے لگایا۔
دکشن کنڑا ضلع کانگریس ہال میں جمعرات کو منعقدہ پریس کانفرنس میں اخبارنویسوں کے سوالات کا جوابات دیتے ہوئے انہوں نے کہاکہ عوامی نمائندوں کے لئے ضروری ہے کہ وہ جو بھی عوامی سطح پر بیانات، جانکاری اور اطلاعات جاری کرتے ہوں ، اس کا انہیں شعور ہونا چاہئے ۔ لیکن شوبھا کرندلاجے کا بیان غیر ذمہ دارانہ اور لاعلمی پر مبنی ہے ۔ ایک رکن پارلیمان ہوکر قانون کا شعور ہونا چاہئے ، اگر معلوم نہیں ہے تو کسی سے حاصل کرلینا چاہئے ، شوبھا کرندلاجے ایسا کچھ بھی نہ کرتے ہوئے صرف اپنے وجو د کو باقی رکھنے کے لئے ہاتھ پیر مارر ہی ہیں۔
یوٹی قادر نے بتایا کہ ریاست کے آئی اے ایس آفیسر انوراگ تیوار ی کی جب غیر فطری موت ہوئی تو اس وقت بھی شوبھا کرندلاجے اور بی جے پی والوں نے بے تکے الزامات کی جھڑی لگادی تھی ، لیکن یہی بی جے پی کے ارکان اسمبلی ودھان سبھا میں اس کا ذکر تک نہیں کیا۔ اپنی پارٹی میں اپنے وجود کے لئے ترسا ں شوبھا کرندلاجے شرتھ مڈیوال قتل معاملے کو این آئی اے کے حوالے کرنےکی بات کہہ رہی ہیں، انہوں نے سوال کیا کہ کیا شوبھا کرندلاجے کو اتنا بھی شعور نہیں کہ این آئی اے کو کونسا معاملہ دینا چاہئے اورکونسا نہیں ؟
انہوں نے یہ بھی پوچھا کہ شرتھ معاملے کے علاوہ اشرف کلائی ، ہریش پجاری ، ونایک بالیگا، پروین پجاری قتل معاملات پر شوبھا نے کیوں بات نہیں کررہی ہیں، یو ٹی قادر نے کہا کہ بنگلور و کے شیواجی نگر میں ہوئے قتل معاملے میں دہشت گردوں کا رول ہونے کی اطلاع ملتے ہی ریاستی حکومت نے کسی کی مانگ کا انتظار کئے بغیر معاملے کو این آئی اے کو سونپا تھا، یو ٹی قادر نے پوچھا کہ کیا یہ بات شوبھا کرندلاجے کو معلوم نہیں ہے ؟ حالیہ دنوں میں مرکزی وزیر داخلہ کو سونپی گئی فہرست کے متعلق وضاحت کرتے ہوئے یو ٹی قادر نے کہاکہ شوبھا کرندلاجے کے لئے یہ وقت خود احتسابی کا ہے ، دستور کو سمجھیں ،بی جے پی والے معاملات کے متعلق بیانات دینے میں جلد بازی سے کام لیتے ہیں، اور عوام کو غلط پیغام دیتے ہیں ، انہیں بھٹکا تے ہیں، انہوں نے واضح کیا کہ اصل قاتلوں کی گرفتاری میں تعاون کرنے کے بجائے ایسے رکیک بیانات کے ذریعے گندی سیاست کرنا شوبھا کو شوبھا نہیں دیتا۔