مینگلور کے قریب بیلتنگڈی میں ایک شخص کا بیہمانہ قتل؛ طالب العلم گرفتار
مینگلور2/ جون (ایس او نیوز) یہاں سے قریب 60 کلو میٹر دور بیلتنگڈی کے سنتے کٹے کے قریب ایک شخص کا بیہمانہ قتل کیا گیا جس کی شناخت تمپا پجاری (52) کی حیثیت سے کی گئی ہے۔ قتل کے الزام میں پولس نے اُسی کے پڑوس میں رہنے والے بی بی ایم II کے طالب العلم چند ر شیکھر (18) کو گرفتار کرلیا ہے، جس نے مبینہ طور پر خود پولس تھانہ پہنچ کر اپنی گرفتاری پیش کی ہے۔ حادثہ جمعہ کی شب پیش آیا۔
ذرائع سے ملی اطلاع کے مطابق رات قریب آٹھ بجے گھر کے باہر ہی دونوں میں کسی بات کو لے کر جھگڑا ہوا اور معاملہ اتنا طول پکڑا کہ چند ر شیکھر نے دھاردار آلے سے تمپا پجاری پر وار کردیا۔ موصول ہونے والے فوٹوز سے پتہ چلتا ہے کہ تمپا پجاری کے چہرے پر زوردار وارکیا گیا ہے جس سے پورا چہرہ پھٹ گیا ہے۔
پولس ذرائع کے مطابق جھگڑا کس بات کو لے کر ہوا تھا، یہ پتہ نہیں چل پایا ہے،البتہ چھان بین کے بعد ہی معاملہ صاف ہوسکتا ہے۔ کچھ لوگوں کے مطابق پانی کو لے کر دونوں میں جھگڑا ہوا تھا، مگر کچھ لوگوں کا یہ بھی کہنا ہے کہ پانی پر جھگڑا ہوا ہوتا تو نوبت قتل تک نہ پہنچتی، ان لوگوں کے مطابق ضرور کوئی دوسری وجہ تھی، جس سے چندرشیکھر برہم ہوگیا تھا اور اپنے ہی پڑوسی کا بیہمانہ قتل کردیا تھا۔
تمپا پجاری کے تعلق سے معلوم ہوا ہے کہ وہ بی ایس این ایل میں لائن مین تھا اور شادی شدہ تھا، اس کو ایک بیٹا اور ایک بیٹی بھی ہے۔ مبینہ قاتل چندرشیکھر کا مکان بھی اُسی عمارت میں مگر پڑوس میں واقع الگ ہے۔ چندرشیکھر اپنی ماں کے ساتھ رہتا ہے اور وہ اُجیرے میں واقع ایس ڈی ایم کالج کا طالب العلم ہے۔
بیلتنگڈی پولس نے معاملہ درج کرلیا ہے اور جانچ جاری ہے۔
