اڈپی 30؍نومبر (ایس او نیوز) دیہی علاقے میں بہت سارے تعلیمی اداروں کے قیام اورصالحات گروپ آف ایجوکیشنل انسٹی ٹیوشنس کے ذریعے عوام کے اندر تعلیمی بیداری لانے او رایک صحتمند سماج کی تشکیل میں اپنی گراں مایہ خدمات انجام دینے والی شخصیت محمدیہ ایجوکیشن ٹرسٹ کے صدر جناب ایم اسماعیل کو اس مرتبہ ضلع راجیہ اتسوا ایوارڈ کے لئے نامزد کیا گیا ہے۔

اڈپی سے 10کیلو میٹر ک دوری پر شمال کی جانب بحیرہ عرب کے ساحل پر واقع پڈوتونسے اور ا س کے مضافاتی علاقے میں بچوں کو تعلیمی سہولت فراہم کرنے کی نیت سے 1971میں جناب اسماعیل صاحب نے اپنے کچھ ہم خیال احباب کے ساتھ مل کرصالحات گروپ آف ایجوکشنل انسٹی ٹیوشن کا آغاز کیا تھا۔ چھوٹے پیمانے پر کام کی ابتد ا کرتے ہوئے 1984میں نرسری اسکول، 1994میں عربک کالج ،1996میں لڑکیوں کے لئے کنڑا میڈیم اسکول اور پھر 1997میں انگلش میڈیم پرائمری اور ہائی اسکول کا قیام عمل میں لایا گیا۔ پھر اپنے تعلیمی مشن کو وسعت دیتے ہوئے ٹرسٹ نے 2009میں لڑکیوں کے لئے پری یونیورسٹی کالج اور پھر اس کے بعد لڑکیوں کے لئے ڈگری کالج قائم کیا۔ اس ٹرسٹ کے تحت چلنے والے تعلیمی اداروں کا معیار بہت ہی بلند ہے جہاں اس وقت 1000سے زائد طلبہ زیر تعلیم ہیں اور ان کے نتائج 100%رہتے ہیں۔بہت سے ذہین مگر غریب طلبہ کو یہاں مفت تعلیم کی سہولت بھی فراہم کی جاتی ہے۔ تعلیمی اداروں کے اس گروپ کی بے مثال ترقی میں جناب اسماعیل صاحب کا کردار بہت ہی اہم رہا ہے اور ا س کی ستائش کے طور پر انہیں ضلع راجیہ اتسوا ایوارڈ کے لئے منتخب کیا گیا ہے۔