زبردست طوفانی بارش سے مینگلور سمیت جنوبی کینراضلع میں بھاری نقصانات
منگلورو 21؍مئی (ایس او نیوز) زبردست طوفانی بارش کی وجہ سے ضلع جنوبی کینرا کے مختلف مقامات پر بھاری نقصانات ہونے کی اطلاعات موصول ہوئی ہیں۔
بتایا جاتا ہے کہ شیبارورو کوڈامنتھیا دئیوستھان کے سامنے نصب دھوجا استھمبا(جھنڈا لگانے کا کھمبا) ٹوٹ کر مندر پر ہی گرگیا۔اسی طرح ہالے انگڈی میں بھی گروڈی اولیا دئیوستھان کے کھمبے کو بھی نقصان پہنچا ہے۔اس کے علاوہ منگلورو، پتور اورسولیا کے علاقوں سے بھاری مالی نقصان ہونے کی خبریں ملی ہیں۔
بائیکمپاڈی انڈسٹریل علاقے میں تباہی: بائیکمپاڈی کے جوکٹّے روڈ پر موٹر گاڑیو ں کی آمد و رفت بہت زیادہ متاثر رہی، کیونکہ یہاں انڈٹینکر میں موجود ڈرائیور بال بال بچ گیا۔موڈبیدری کے اطراف میں بہت سارے درخت اکھڑجانے کی وجہ سے بجلی کی فراہمی متاثر ہوئی۔یہاں سے قریب گوری مندر کے پاس واقع ایک گھر کو بڑا نقصان پہنچا ہے۔
ایئر پورٹ جانے والے مسافر مشکل میں: صبح 3.45سے 6بجے کے دوران منگلورو انٹرنیشنل ایئر پورٹ جانے والے مسافروں کو سخت مشکلات کا سامنا کرنا پڑا۔کیونکہ نیشنل ہائی وے 67پرماراوور جنکشن کے پاس بہت بڑا درخت اکھڑ کر گر گیا تھا۔اس درخت کے گرنے سے بہت سارے الیکٹرک پول بھی ٹوٹ گئے یا زمین سے اکھڑ گئے۔بجپے کی حدود میں ربر اور سپاری کے باغات کو بھاری نقصان ہوا ہے۔
150بجلی کے کھمبے اکھڑ گئے: سولیا کے علاقے میں تیز طوفانی ہواؤں اور بارش کی وجہ سے 150بجلی کے کھمبے اکھڑگئے ہیں۔اس کے علاوہ بڑی تعداد میں درخت بھی زمین سے اکھڑ گئے ہیں۔ٹوٹنے اور زمین سے اکھڑجانے والے بجلی کے کھمبوں کو دوبارہ نصب کرنے کاکام بڑی تیزرفتاری سے انجام دیا جارہا ہے۔بڑی تعداد میں سپاری درخت بھی گر گئے ہیں۔ سمودایا اسپتال میں سیمنٹ کے شیٹس والی جو چھت تھی اسے تیز ہوائیں اڑالے گئیں۔آسمانی بجلی گرنے ایک اسکول کی دیواروں اورچھت میں شگاف پڑنے اوراسکول میں موجود تمام الیکٹرک ساز وسامان جل کر خاک ہونے کی بھی خبر ہے۔
