کنداپور میں بے قابو بائک درخت سے ٹکراگئی۔ 5سالہ بچی ہلاک
کنداپور19؍مارچ (ایس او نیوز) کنداپورتعلقہ کے شنکر نارائنا قصبے میں پیش آئے ایک المناک حادثے میں پانچ سالہ بچی کی موت واقع ہوگئی۔ حادثہ اتوار کی شام کو اُس وقت پیش آیا جب لڑکی کو علاج کے لئے ایک اسپتال میں جانچ کرانے کے بعد واپس لوٹ رہے تھے۔ ہلاک ہونے والی بچی کانام سینچنا ہے جوکہ واسو اور وسنتی نامی والدین کی اکلوتی اولاد تھی۔
اطلاع کے مطابق وسنتی کی طبیعت کچھ خراب ہوگئی تھی۔ اس کے ایک واقف کار کرشنا نے شنکرنارائنا اسپتال سے دوائی لاکر دینے کی پیش کش کی اور جب و ہ اپنی موٹر بائک پر دوائی لینے کے لئے نکلا تو بچی سینچنا بھی اس کے ساتھ چلی گئی۔ بتایا گیا ہے کہ واپسی میں راستے پر بائک بے قابو ہوگئی اورسڑک کے کنارے موجود ایک درخت سے ٹکرا گئی جس سے بچی کو چوٹیں آئیں اور اس نے وہیں دم توڑ دیا۔ جبکہ بائک سوار پوری طرح محفوظ رہا۔
شنکر نارائنا پولیس اسٹیشن میں کیس درج کرنے کے بعد لاش پوسٹ مارٹم کے لئے سرکاری اسپتال لے جائی گئی ہے۔ پولس مزید چھان بین کررہی ہے۔