کمٹہ ایئرپورٹ کی تعمیرمیں نئی رکاوٹ۔بحری اڈے کے افسران رن وے کے سوا دوسری زمین دینے کے لئے نہیں تیار!
کمٹہ 30؍ستمبر (ایس اونیوز) یہاں سے قریب آلگیری پہاڑی پر سول ایوی ایشن ایئر پورٹ کی تعمیر کے لئے زمین کا سروے کرنے کے خلاف مقامی عوام نے پہلے ہی سے سخت احتجاج کرتے ہوئے رکاوٹ پید ا کی تھی ۔اب بحری اڈے کے افسران نے بھی ایک شرط عائد کردی ہے کہ :’’ہمار ا رن وے چاہیں سول ایوی ایشن (شہری ہوابازی) کے لئے استعمال کریں لیکن بقیہ زمین عمارت کی تعمیرات کے لئے آپ کو لوگوں کو اپنی زمین حاصل کرنی ہوگی۔‘‘
ایئر پورٹ اتھاریٹی انڈیا کے افسرا ن ڈپٹی کمشنر ایس ایس نکول کے ساتھ جب شہری ہوائی اڈے کی تعمیر کے سلسلے میں آلگیری پہاڑی پر پہنچے تو نیول افسران نے یہ شرط ان کے سامنے رکھی۔نیول افسران نے واضح طور پر کہا کہ وہ صرف اپنا رن وے استعمال کرنے کی اجازت دیں گے اور بقیہ تعمیرات کے لئے اضافی زمین محکمہ کو اپنے طور پر نئے سے حاصل کرنا ہوگا بحری اڈے کے ذریعے تحویل میں لی گئی زمین وہ شہری ہوابازی محکمے کو دینے والے نہیں ہیں۔
پتہ چلا ہے کہ اس موقع پر ڈپٹی کمشنر اور بحری اڈے کے افسران کے درمیان کافی دیر تک بحث و گفتگو ہوئی۔ دوسری طرف وہاں پر بڑی تعداد میں مقامی افراد بھی موجود تھے۔ اور انہوں نے بھی ایئر پورٹ کی تعمیر کے سلسلے میں مخالفانہ آوازیں بلند کیں۔ کہا جاتا ہے کہ مقامی افراد اگر آخر میں اپنی اضافی زمینیں سرکاری تحویل میں دینے پر راضی ہو بھی جائیں گے ، تب بھی وہ لوگ اس علاقے سے اپنا گھر بار چھوڑ کر کہیں اور جانے کے لئے تیار نظر نہیں آرہے ہیں۔
اس کے علاوہ ایئر پورٹ اتھاریٹی کے سامنے نیول اڈے کے افسران نے یہ مسئلہ بھی رکھا کہ آلگیری کی اس پہاڑی پر جو اتنا وسیع و عریض ایئرپورٹ تعمیر کیا جارہا ہے ، اس کے بعد برسات کے موسم میں یہاں جو پانی جمع ہوجائے گا وہ کس ندی، نالے یا دریا میں چھوڑا جائے گا اس پر بھی ضرور غور کریں۔ کیونکہ برسات کے موسم جس طرح موسلادھار پانی یہاں برستا ہے اس کے پیش نظر طغیانی کی کیفیت پید اہونا فطری بات ہوگی۔