منگلورو: 44سال پہلے صندل سپلائی کے معاملے میں مطلوب 65سالہ شخص گرفتار
منگلورو/کاسرگوڈ :27/جولائی (ایس اؤ نیوز) دکشن کنڑا ضلع کی پتور پولس نے 65 سالہ ایک معمر شخص کو اُس کے گھر سے یہ کہہ کر گرفتار کرلیا کہ یہ شخص 44 سال پرانے ایک صندل کی لکڑی کے معاملے میں پولس کو مطلوب تھا۔ گرفتار شدہ شخص کی شناخت عباس کے طور پر کی گئی ہے۔ گرفتار شخص کو بعد میں عدالت نے ضمانت پر رہا کردیا۔
ذرائع سے ملی اطلاع کے مطابق 44برس پرانے کیس میں دکشن کنڑا ضلع پتور کی پولس عباس کو گرفتار کرنے جب اُس کے گھر پہنچی تو ملزم حیرت زدہ رہ گیا۔ بتایا گیا ہے کہ 15جولائی 1974کو عباس اپنی بائک کے ذریعے 7 کلو صندل کی لکٹری لے جارہاتھاتو بلیری چک پوسٹ پر ڈیوٹی پر تعینات ہیڈ کانسٹبل گنگوجی راؤ سواریوں کی جانچ کررہے تھےتو اس دوران عباس فرار ہونے میں کامیاب ہوگیا تھا ، مگر قادر نامی ایک شخص پولس کے ہتھے چڑھ گیا تھا۔ بتایا گیا ہے کہ عباس اور اس کے ساتھی قادر کے خلاف پتور پولس تھانےمیں کیس درج ہواتھا۔ مگر قادر عدالت کی سنوائی کے بعد بے قصور ہوکر رہا ہوگیا تھا۔ جب کہ عباس مفرور قرار دیا گیا تھا۔
اطلاع کے مطابق ہیڈکانسٹبل پرمیشور اس معاملے کی جانکاری جٹانے کے لئے پچھلے 4مہینوں سے مصروف تھے۔ اور جانکاری ملتے ہی وہ کیرلا کے کاسرگوڈ ضلع چنگل دیہات کے کونیلا پہنچے اور 44 سال پرانے کیس میں مطلوب عباس کو گرفتار کرنے میں کامیابی حاصل کی۔ پولس کا کہنا ہے کہ 44 سال قبل جب عباس فرار ہوا تھا تو اُسی وقت عباس نے اپنا گھر اور پتہ بدل کر کیرلا چلا گیا پھر وہاں اپنا نام بدل کر بشیر کے نام سے رہائش اختیار کی تھی، پولس کا دعویٰ ہے کہ گرفتاری کے بعد ابتداء میں اس نے اپنے جرم کو قبول کرنے سے انکارکیا تھا لیکن سختی کے بعد اس نے اپنا جرم قبول کرلیا۔ بتایا گیا ہے کہ گرفتاری کے بعد جب عباس کو عدالت میں پیش کیا گیا تو عدالت نے اسے ضمانت پر رہا کردیا ہے۔
معاملے کے متعلق پولس نے واضح کیا ہے کہ وہ پچھلے کئی مہینوں سے طویل المدت بقیہ کیسوں کی چھان بین کررہی ہے ، اس سلسلے میں کئی ملزموں کی گرفتاری کا سلسلہ جاری ہے عباس کا معاملہ بھی اسی کی ایک کڑی ہے۔