کاسرگوڈمیں بجلی کا تار چھونے سے 6سالہ بچی ہلاک، ماں شدید زخمی
کاسرگوڈ 2؍اکتوبر (ایس او نیوز)کمبداجے کے اتیتھاڑکا علاقے میں زمین پر گرے ہوئے بجلی کے تار پرانجانے میں پاؤں رکھنے کی وجہ سے ایک 6سالہ بچی ہلاک ہوگئی اور اسے بچانے کی کوشش کرنے والی اس کی ماں شدید زخمی ہوگئی ہے۔
موصولہ رپورٹ کے مطابق ہلاک ہونے والی بچی کا نام آرپیتا تھا جو کہ اول جماعت کی طالبہ تھی۔ بچی جب شام کو اسکول سے گھر لوٹی تھی تو کچھ دیر بعد گھر سے باہرکے احاطے میں چلی گئی۔اس سے قبل تیز ہوائیں چلنے کی وجہ سے درخت گرگیا تھا اور اس کے نتیجے میں الیکٹرک کیبل ٹوٹ کر زمین پر گر ا ہواتھا جس کے اندر بجلی دوڑ رہی تھی۔ معصوم آرپیتا نے انجانے میں جیسے ہی کیبل پر پاؤں رکھا اسے بجلی کا زبردست جھٹکا لگا۔ یہ دیکھ کر اس کی ماں اسے بچانے کے لئے دوڑ پڑی اور وہ بھی بجلی کی زد میں آکر زخمی ہوگئی۔
فوری طور پر بجلی کی سپلائی بند کرکے آرپیتا کوکاسرگوڈ جنرل اسپتال لے جایاگیا مگر اس کی جان بچائی نہیں جاسکی۔ اس کی ماں شدید زخمی حالت میں زیر علاج ہے۔ بتایا جاتا ہے کہ آرپیتا کا باپ ایک تعمیراتی مزدور ہے جبکہ اس کی ماںآنگن واڈی معاون کے بطور خدمات انجام دے رہی ہے۔ آرپیتا اپنے والدین کی سب سے چھوٹی بچی تھی۔ اس کا بڑا بھائی9 ویں جماعت میں اور دوسرا تیسری جماعت میں زیر تعلیم ہے۔ بڈیاڈکا پولیس اسٹیشن میں کیس درج کرلیا گیا ہے۔