کاروار:22/ جولائی(ایس او نیوز)اترکنڑا ضلع پنچایت چیف ایگزکیٹیو افسر ڈاکٹر رام پرساد منوہر کا  بلاری ضلع ڈپٹی کمشنر کے طور پر تبادلہ کیا گیا ہے۔

جمعرات کو ریاستی حکومت کی طر ف سے جن 29آئی اے ایس افسران کا تبادلہ کیا گیا ہے اُن میں ساحلی اضلاع کے تین اہم عہدوں پر نئے تقررات کے ساتھ عہدوں پر فائز افسران کے تبادلے کا بھی ذکر ہے اسی میں اترکنڑا ضلع کے سی ای اؤ رام پرساد کو بلاری ڈی سی کے طورپر تبادلہ کئے جانے کی جانکاری دی گئی ہے۔ اگلا حکم جاری ہونے تک اترکنڑا ضلع کے ڈی سی ہی ضلع پنچایت سی ای اؤ(چیف ایکزی کوٹیو آفسر) کے کارگزار افسر ہونگے۔

دو سال قبل بھٹکل اسسٹنٹ کمشنر کے عہدے پر فائز ڈاکٹر رام پرساد منوہر کوترقی دیتے ہوئےاترکنڑا، ضلع پنچایت سی ای اؤ مقررکیا گیا تھا۔ بھٹکل میں انہوں نے بہت سارے قابل تحسین کاموں کو انجام دیا تھا، کم گو ، سنجیدگی کا مظہر ڈاکٹر رام پرساد منوہر نے ضلع پنچایت سی ای اؤ کے طورپر دشا، عبدالکلام فلوشپ اور سوریایوجنا کو جس متحرک انداز میں جاری کیا اور اس کو عوام تک پہنچانے میں جو کام کئے وہ پوری ریاست میں قدر کی نظروں سے دیکھے گئے ۔ ہمیشہ ایک متحرک افسر کے طورپرخدمات انجام دینے والے  رام پرساد منوہرکے دور میں اترکنڑا ضلع کئی ایک شعبہ جات میں ریاست میں اول نمبر پر رہا۔ حال ہی میں ان کے تبادلے کی خبریں تھیں اور ہبلی دھارواڑ مہا نگر پالیکا کمشنر کے طورپر تبادلہ ہونے کے امکانات تھے ، لیکن ان کی خدمات کے پیش نظر انہیں بلاری کا ڈی سی بنایا گیا ہے۔ اس سے قبل اترکنڑا ضلع کے ڈی سی اجول کمار گھوش کلبرگی کے ڈی سی بنائے گئےہیں۔ خیال رہے کہ ساحلی ضلع دکشن کنڑا کے ڈی سی اے بی ابراہیم کا بھی تبادلہ کیا گیا ہے ان کی جگہ ڈاکٹر جگدیش ڈی سی بنائے گئے ہیں۔ تو اُڈپی ڈی سی کا جو عہدہ خالی تھا وہاں ٹی وینکٹیش کاتقرر ہواہے۔