ضلع اُترکنڑا میں ہوئے 2سرکاری بس حادثات کے بعد دونوں بس ڈرائیور معطل
کاروار:12/ جولائی (ایس او نیوز) گذشتہ سنیچر کو کمٹہ میں پیش آئے ایک سڑک حادثہ میں کے ایس آر ٹی سی بس اور ہسکام گریڈ کا بڑا کھمبا لے جانے والی لاری کے درمیان پیش آئی ٹکر میں سرکاری بس ڈرائیور پنڈلک گوڈا کو لاپرواہی سے بس چلانے کے الزام میں معطل کیا گیا ہےاوراسی طرح 24جون کوسرکاری بس کاروار کے بیت کھول کے گڈھے میں گرنے سے کئی مسافر زخمی ہوئے تھے ، اُس حادثے میں بھی بس ڈرائیور شرنپا بسپا پتّار کو نشے کی حالت میں بس ڈرائیونگ کرنے کے الزام میں معطل کردیا گیا ہے۔ اس بات کی جانکاری کے ایس آر ٹی سی زونل آفیسر سدیشورہیبال نے دی ہے۔
کمٹہ کے قومی شاہراہ پر ہوئے بس اور لاری کی ٹکر میں 3 مسافر ہلاک اور کئی زخمی ہوئے تھے ، بتایا گیا ہے کہ اگر ڈرائیور نے غفلت نہ برتی ہوتی تو حادثےسے بچا جاسکتا تھا، اسی بنیاد پر بس ڈرائیور کو معطل کئے جانے کی بات کہی گئی ہے۔ بتایا گیا ہے کہ آرٹی او نے کمٹہ حادثے میں بس ڈرائیور کی ہی لاپرواہی کو حادثے کے لئے ذمہ دار ٹہرایا ہے۔
خیال رہے کہ ایک بڑا کھمبا، جس کے دونوں سِروں کا کافی حصہ لاری سے باہر تھا، سرکاری بس سے جاٹکرایا تھا، جس پر سوشیل میڈیا میں کافی بحث چھڑ گئی تھی کہ ایسے لاریوں کو آر۔ٹی او ضلع میں داخل ہونے کی اجازت کیسے دیتے ہیں۔ عوام آر۔ٹی او سے سوال کررہے تھے کہ کئی ایک چیک پوسٹ پر گذرنے کے بائوجود اس لاری کو کیوں نہیں روکا گیا تھا، مگر آر۔ٹی۔او نے حادثے کے لئے بس ڈرائیور کو ہی ذمہ دار ٹہرا دیا ہے، جس پر کاروائی کرتے ہوئے سرکاری بس ڈرائیور کو اپنی نوکری سے معطل کردیا گیا ہے۔
