کاروار:یکم ڈسمبر (ایس او نیوز) ایڈس (ایچ آئی وی)کے متعلق  سال ِ رواں محکمہ صحت عامہ کی طرف سے جاری کردہ رپورٹ کے مطابق ایڈس میں ضلع اترکنڑا 28ویں مقام پر ہے جہاں کل 106ایچ آئی وی مریض ہیں۔محکمہ کی جانب سے وضاحت کی گئی ہے کہ سرسی اور کاروار اے آر ٹی مراکز میں 2317افراد نے ایڈس کی  دوائی حاصل کی ہیں۔

رپورٹ کے مطابق سال 2017-2018 میں اترکنڑا ضلع میں 171افراد ایچ آئی وی میں مبتلا تھے۔ ضلع میں 40701افراد کی ایچ آئی وی جانچ کی گئی جس میں 83مرد اور 88عورتیں ایڈس مرض میں مبتلا ہونے کی تصدیق ہوئی ہے۔ 25761حاملہ عورتوں کی جانچ کی گئی تو 10ایچ آئی وی کی تصدیق ہوئی ۔ لیکن سال 2018اپریل سے اکتوبر تک 38527 عام لوگوں کی ایچ آئی وی کے متعلق جانچ کی گئی تو 106افراد ایڈس مرض میں مبتلا ہونے کی تصدیق ہوئی، ان میں 54مرد اور 52عورتیں شامل ہیں۔اسی طرح اس سال اپریل سے اکتوبر تک  15347 حاملہ عورتوں کے خون کی جانچ کی گئی تو 9عورتیں اس مرض میں مبتلا پائی گئیں ہیں۔

حالیہ برسو ں کا موازنہ کریں تو ضلع میں ایڈس کی شرح میں کمی آئی ہے،عوام میں اس تعلق سے بیداری پیدا ہورہی ہے، محکمہ صحت عامہ مرض کو پھیلنے سے روکنے میں سرگرم ہے اور کڑی نگرانی کررہاہے، ایڈس مریضوں کو دوائیاں مہیا کی جارہی ہیں ، ان سب کا نتیجہ یہ ہے کہ خطرناک بیماری میں کمی آرہی ہے۔

ایچ آئی وی میں مبتلا اور ایچ آئی وی نگٹیو والوں کے مرض کی تشخیص کرتے ہوئے ان کے علاج کے لئے اے آر ٹی مراکز کی جانب سے دوائیاں مہیا کی جارہی ہیں۔ کاروار کے ضلع اسپتال اور سرسی کے پنڈت اسپتال میں مراکز کاافتتاح ہوچکاہے یہاں دوائیاں دی جارہی ہیں، 2317افراد دوائیاں حاصل کرنے کی رپورٹ میں جانکاری دی گئی ہے۔ محکمہ کی  رپورٹ کے مطابق   ضلع کے تعلقہ جات میں ایچ آئی وی میں مبتلا مریضوں کی تفصیل کچھ اس طرح ہے۔

کاروار 366۔انکولہ 308۔ کمٹہ 274۔ہوناور 243۔یلاپور 140۔ہلیال 175۔جوئیڈا80۔سرسی 295۔سداپور 106۔ بھٹکل 182۔منڈگوڈ 117 سمیت دیگر اضلاع سے 31افراد مراکز سے دوائیاں لے رہے ہیں۔