کاروار :کوئی منصوبہ انسانی جان سے اہم اور بڑا نہیں ،شاہراہ حادثات کے لئے آئی آربی کمپنی ذمہ دار :کریمنل کیس کا انتباہ؛اعلیٰ سطحی میٹنگ میں ڈی سی کا سخت موقف
کاروار:14/جون (ایس اؤنیوز)سال رواں ہورہی بارش نے قومی شاہراہ کی توسیعی کاموں کے غیرمعیاری پن کو ظاہر کرنے والے پے درپے ہورہے واقعات کو دیکھتے ہوئے ضلعی مرکز کاروار میں ضلع ڈپٹی کمشنر نے اپنے دفتر میں ضلع کے اعلیٰ افسران ، نیشنل ہائی وے اتھارٹی آف انڈیا اور آئی آر بی کمپنی کے افسران کے ساتھ اعلیٰ سطحی میٹنگ کا انعقاد کیا۔ میٹنگ میں ڈپٹی کمشنر ایس ایس نکول نے این ایچ اے آئی اور آئی آر بی کمپنی کے افسران کو قومی شاہراہ کی توسیع کاموں کے دوران زمین کھسکنے اور دیگر آفتوں کو ٹالنے کے لئے سائنٹفک طریقے اپنانے کےلئے اقدامات کرنے کی سخت تاکید کی۔
کمٹہ کے نواحی علاقے تنڈرکولی میں واقع ہوئے حادثے کے پس منظر میں ڈی سی نے میٹنگ میں افسران کو واضح ہدایات دیتے ہوئے مکینوں ، سواریوں اور عوام کا خاص خیال رکھنے کی بات کہی۔ ڈی سی نے باقاعدہ حوالے سے بات کرتے ہوئے کہاکہ جب تنڈرکولی میں حادثہ ہواتو حفاظتی اقدامات کے لئے وہاں کمپنی کا کوئی بھی ماہر نہیں تھا، اسی طرح مطلوبہ تعداد میں مشین بھی نہیں تھے، اس طرح کی غفلت کو برداشت نہیں کیا جائے گا، ڈی سی نے افسران کو انتباہ دیتے ہوئے کہاکہ اگر آئندہ اس طرح کا کوئی واقعہ یا حادثہ ہوتا ہے تو این ایچ اے آئی اور آئی آربی افسران کے خلاف کریمنل مقدمہ درج کرنا مجبوری ہوگی ۔ کمپنی کو موسم باراں سے پہلے ہی مطلع کیا گیا تھا کہ شاہراہ پر جہاں کہیں حادثات کے خدشات ہیں وہاں حفاظتی اقدامات کریں۔ واقعات خود اس بات کاواضح ثبوت پیش کررہی ہیں کہ نہ پیشگی حفاظتی اقدامات کئے گئے اور حادثہ وقوع ہونے کے بعد فوری طورپر اس کی طرف توجہ دی گئی۔ کوئی بھی منصوبہ انسانی زندگی سے اہم اور بڑا نہیں ہے۔ شاہراہ کی نگرانی کرنا اتھارٹی کی ذمہ داری ہے جب کہ وہ اپنے فرائض کو ٹھیک طرح انجام دنہیں دے رہی ہے۔ محکمہ تحصیل کی جانب سے شاہراہ پر پیش آنے والے پہاڑ کھسکنے کے مقامات کی نشاندہی کی گئی ہے، اتھارٹی اور کمپنی اپنی طرف سے بھی ایسے جگہوں کی نشاندہی کرکے متعلقہ مقامات پر کئے جانے والے پیشگی حفاظتی اقدامات کے متعلق جمعہ تک رپورٹ سونپنےکی تاکید کی۔ آئی آر بی کمپنی کے سنئیر تکنکی افسر موسم باراں ختم ہونے تک لازماً کاروار میں قیام کرنے کی بات کہی۔ شاہراہ پر پیش آنے والے حادثات کے لئے آئی آربی کمپنی ہی راست ذمہ دار ہے ، جہاں کام جاری ہے وہاں برائے نام نوٹس بورڈ اور تاکیدی بورڈ لگائے گئے ہیں، خطرناک موڑ پر بھی گڑھے کھودے گئے ہیں، سخت بیارکیڈ نہیں لگائے گئےہیں، تاکیدی لائٹ کو بھی نصب نہیں کیا گیا ہے ، کمپنی کی غیر ذمہ داری سے کوئی حادثہ ہوتاہے تو کمپنی افسران کے خلاف کیس داخل کرنے کا ضلع ایس پی ونایک پاٹل نے میٹنگ میں انتباہ دیا۔ ضلع پنچایت افسر چندر شیکھر نایک، اتھارٹی کے جنرل مینجر پرساد، کمپنی کے جنرل مینجر اگروال، اپر ڈی سی ایچ، پرسنا، اے سی رمیش کلسد، شیوانند کرالے سمیت کئی اعلیٰ افسران میٹنگ میں موجو دتھے۔