بھٹکل 9/ستمبر (ایس او نیوز) بھٹکل کے سماجی کارکن اور ہرطرح کے کارخیر میں بڑھ چڑھ کر حصہ لینے والے نوجوان محمد ارشاد صدیقہ کو کرناٹک یوُا سینا نے بھٹکل شہر کے لئے صدر کے عہدہ پر منتخب کیا ہے، جبکہ نائب صدر کے طور پر محمد یونس مصباح کا انتخاب عمل میں آیا ہے۔ اس بات کی جانکاری کرناٹک یُوا سینا کے ضلعی صدر محبوب علی نے دی۔ سرسی سے بھٹکل تشریف لاتے ہوئے انہوں نے ارشاد صدیقہ کو اس عہدہ کے لئے منتخب کئے جانے پر اپنی جانب سے مبارکباد پیش کرتے ہوئے نیک خواہشات کا اظہار کیا۔
محبوب علی نے بتایا کہ کرناٹک یُوا سینا ہر قسم کے سماجی کاموں میں آگے آکر کام کرتا ہے،مزید بتایا کہ ہمیں اس بات کی جانکاری تھی کہ بھٹکل میں ارشاد صدیقہ نہایت سرگرم نوجوان ہیں اور کسی بھی معاملے کو حل کرنے میں پیش پیش رہتے ہیں، اس بنا پر بھٹکل میں اُنہیں مزید متحرک ہوکر کام کرنے کے لئے ہم نے اپنے ادارہ میں انہیں صدر کے عہدہ پر منتخب کیا ہے۔ محبوب علی نے بتایا کہ کوئی بھی کام اکیلے کرنے کے مقابلے میں ایک کمیٹی میں رہ کر کرنے سے اُس کا اثر زیادہ ہوتا ہے۔کرناٹک یُوا سینا کے تعلق سے جانکاری دیتے ہوئے بتایا کہ اس سینا میں ہندو، مسلم ، کرسچن ہر طبقہ اور ذات کے لوگ شامل ہیں اور ہم سب مل جل کر انسانیت کی بھلائی کے لئے کام کرتے ہیں۔ محبوب علی کے مطابق شری دھر نائک کرناٹک یُوا سینا کے بھٹکل تعلقہ کے صدر ہیں۔
محبوب علی کے ہاتھوں ارشاد صدیقہ کو صدر کے عہدہ پر منتخب کئے جانے اور یونس مصباح کو نائب صدر منتخب کئے جانے پر دونوں کو کرناٹک یوُا سینا کی سند سے نوازا گیا۔ اس موقع پر بھٹکل تعلقہ صدر شری دھر نائک سمیت سرسی سے تشریف فرما ادارہ کے دیگر ذمہ داران بھی موجود تھے۔