پتور اسپتال سے فساد کا ملزم رتناکر شیٹی فرار،3 پولیس اہلکار معطل
پتور،15؍جون (ایس او نیوز)کلڈکا فساد کے تعلق سے گرفتار شدہ ایک ملزم پتور اسپتال سے فرار ہوگیا ہے ، جس کی پاداش میں تین پولیس اہلکاروں کو معطل کر دیا گیا ہے۔
فرار ہونے والا ملزم ہندتووادی تنظیم ہندو جاگرن ویدیکے کا مقامی صدر رتناکر شیٹی ہے جو پتور اسپتال میں اپنے زخموں کے علاج کے لئے داخل تھا او ر اس کی نگرانی پر پولیس اہلکارمتعین تھے۔ رتناکر شیٹی پرکلڈکا میں خلیل نامی مسلم نوجوان پر قاتلانہ حملہ میں ملوث ہونے کا الزام ہے۔
اپنی ذمہ داری نبھانے میں ناکامی اور بے پروائی کے لئے ضلع پولیس سپرنٹنڈنٹ گلاب راؤ بوراسے نے پی ایس آئی اومانا، ہیڈ کانسٹیبل رادھا کرشنا اور کانسٹیبل رمیش لمانی کو معطل کرنے کے احکامات جاری کردئے ہیں۔بتایا جاتا ہے کہ پتور اور بنٹوال شہر کی پولیس مفرور ملزم کی تلاش میں مصروف ہے۔
