بھٹکل 10؍اپریل (ایس او نیوز) بھٹکل کے تحصیلدار دفتر میں منعقدہ بھٹکل ہوناور اسمبلی حلقے کے الیکٹورل افیسرز کی میٹنگ میں خطاب کرتے ہوئے ضلع ڈپٹی کمشنر ایس ایس نکول نے کہا کہ افسران کو کسی بھی قسم کے دباؤ میں آئے بغیر انتخابی ضابطہ اخلاق کو نافذ کرنا چاہیے۔

مسٹر نکول نے افسران سے کہا کہ حلقے کے کسی بھی کونے سے شکایت موصول ہوجائے توافسران کو فوری اس پر توجہ دینااور مناسب کارروائی کرنا ضروری ہوگا۔ اس طرح بے خوف ہوکر کام کریں گے تو انتخابی افسران کے سلسلے میں لگنے والے الزامات کم ہوجائیں گے۔غیرمحسوب رقم دستیاب ہونے پر ٹیکس ڈپارٹمنٹ کے افسران اور غیر قانونی شراب اسمگلنگ کے تعلق سے محکمہ آبکاری کے افسران کو مطلع کیا جاتا ہے، تاکہ ان معاملات میں اگلی کارروائی انجام د ی جاسکے۔اس کے علاوہ ووٹنگ مشین کے تعلق سے بھی بے پروائی اور غفلت نہیں ہونی چاہیے۔ ڈی سی نے واضح کیا کہ جن افسران کو انتخابی ذمہ داریاں سونپی گئی ہیں، انہیں صرف مخصوص حالات میں ہی چھٹی لینے کی اجازت ہوگی۔تمام افسرا ن کو چاہیے کہ وہ انتخابات سے متعلقہ تمام معاملات میں انتہائی چوکسی کا مظاہرہ کریں۔

اس میٹنگ میں ضلع پنچایت سی ای او چندر شیکھر نائک، پروبیشنری اسسٹنٹ کمشنر آنند ، بھٹکل اے سی سدّیشور کے علاوہ بھٹکل ہوناور اسمبلی حلقے کے لئے تعینات کیے گئے تمام انتخابی افسران موجود تھے۔