منگلورومیں لاڈجنگ میں چلائے جارہے جسم فروشی کے اڈے پر چھاپہ۔ بنگلہ دیشی لڑکیوں سمیت 6خواتین کو بچالیا گیا
منگلورو22؍جون(ایس او نیوز) منگلورو کے پمپ ویل علاقے میں واقع مشہور ہوٹل انّا پورنا لاڈجنگ میں چلائے جارہے جسم فروشی کے اڈے پر میسورو کی این جی او ’وڈاناڈی سمستھا‘ کے کارکنان اور کدری پولیس نے مشترکہ چھاپہ مارتے ہوئے بنگلہ دیشی لڑکیوں سمیت 6خواتین کو بچالیا ہے۔
موصولہ رپورٹ کے مطابق میسورو کی این جی او کو اطلاع ملی تھی کہ مذکورہ ہوٹل سے مبینہ طور پر ’انسانی تجارت‘(ہیومن ٹریفکنگ) کا کاروبار کیا جاتا ہے اور یہاں پر فروخت کرنے کے لئے بنگلہ دیش سے بچے لائے گئے ہیں۔ اس بنیا د پر جب چھاپہ مارا گیا تو وہاں پر بچے تو موجود نہیں تھے اور انسانی تجارت کا کوئی معاملہ نہیں تھا مگر ایک خفیہ کمرے کا دروازہ توڑنے پرپتہ چلا کہ وہاں پر جسم فروشی کادھندا چلایا جارہا ہے اور اس مقصد کے لئے کم عمر لڑکیوں سمیت خواتین کو اندر چھپا کر رکھا گیا ہے۔پولیس اور سماجی تنظیم کی مدد سے اس دھندے میں استعمال کی جانے والی چھ خواتین کو بچالیا گیا جن میں بنگلہ دیشی لڑکیاں بھی شامل تھیں۔