بھٹکل، ہوناور، کمٹہ، کاروار سمیت ساحلی کرناٹکا میں موسلادھار بارش؛ گوکرن میں راستے تالاب میں تبدیل؛ کئی دکانوں میں گھس گیا پانی
بھٹکل 7/جون (ایس او نیوز) آج جمعرات صبح سے ہی بھٹکل سمیت پورے ساحلی کرناٹکا میں موسلادھار بارش کا سلسلہ جاری ہے جس کو دیکھتے ہوئے کہا جاسکتا ہے کہ مانسون ساحلی کرناٹک میں داخل ہوچکا ہے۔ صبح سے لے کر شام تک نہ صرف اُترکنڑا بلکہ پڑوسی ساحلی ضلع اُڈپی اور دکشن کنڑا میں بھی موسلادھار بارش جاری ہونے کی خبر ملی ہے جس سے معمول کی زندگی درہم برہم ہوگئی ہے۔
اُدھر اُترکنڑا کے سیاحتی مقام گوکرن میں صبح سے جاری موسلادھار بارش کے نتیجے میں کے ایس آر ٹی سی بس اسٹائنڈ اور اس کے باہرروڈ پر بھاری مقدار میں پانی جمع ہوگیا جس سے نہ صرف اسکولی بچوں کو راستہ سے گذرنے میں سخت دشواری پیش آئی بلکہ سواریوں کے لئے بھی راستہ سے گذرنا دو بھر ہوگیا۔ یہاں کا پورا علاقہ تالاب میں تبدیل ہونے کی وجہ سے عوام کو سجھائی نہیں دے رہا تھا کہ راستہ کس طرف ہے اور نالہ کس طرف ہے۔
بتایا گیا ہے کہ اس علاقہ میں کئی دکانوں میں بھی پانی بھرنے کے وجہ سے دکانداروں کے لئے مشکلات پیدا ہوگئی۔ یہاں صبح سے ہی طوفانی ہوائوں کے ساتھ بارش جاری رہی ، جبکہ راستوں پر پانی کے بہائو میں کافی تیزی بھی دیکھی گئی۔
کاروار، انکولہ ، کمٹہ اور ہوناور میں بھی صبح سے بارش کا سلسلہ جاری رہا۔ پڑوسی ضلع اُڈپی کے کنداپور، بیندور اور گنگولی سمیت دکشن کنڑا کے مینگلور اور اطراف کے علاقوں میں بھی صبح سے زور دار بارش ہونے کی اطلاعات ملی ہیں۔
