بھٹکل میں موسلادھار بارش؛ سہ پہر کو ہی رات کا سماں؛ کنداپور، اُڈپی اور ہبلی میں بھی موسلادھار بارش؛ یادگیر میں بجلی گرنے سے چار ہلاک
بھٹکل 28/ستمبر (ایس او نیوز) کافی دنوں کے وقفے کے بعد آج سہ پہر کو بھٹکل میں اچانک مغرب جیسا اندھیرا چھا گیا، جس کے ساتھ ہی موسلادھار بارش شروع ہوگئی، جس کا سلسلہ رات تک جاری تھا۔ بھٹکل کے ساتھ ساتھ پڑوسی علاقوں کنداپور اور اُڈپی میں بھی شام کو اچانک موسم بدلنے اور زوردار بارش ہونے کی اطلاعات موصول ہوئیں۔ البتہ بھٹکل کے شمالی علاقوں ہوناور، کمٹہ اور کاروار وغیرہ میں صرف اسمان میں بادل چھائے ہوئے دیکھے گئے اور ہلکی ہلکی بارش ریکارڈ کی گئی۔اُدھر ہبلی میں بھی سہ پہر سے زوردار بارش ہونے کی اطلاع ملی ہے، جبکہ یادگیر میں بجلی گرنے سے چار لوگوں کے ہلا ک ہونے کی خبر موصول ہوئی ہے۔
بھٹکل میں بارش سے عام زندگی مفلوج ہوکر رہ گئی۔ لوگوں کا گھروں سے باہر نکلنا دشوار ہوگیا۔ ماری کٹہ، مین روڈ اور اولڈ بس اسٹائنڈ کی طرف سڑکوں پر کافی مقدار میں پانی جمع ہوگیا جس سے سواریوں کو گذرنے میں کافی مشکلات پیش آئیں۔
محکمہ موسمیات کے مطابق بھٹکل میں گزشتہ سال 28 ستمبر تک 3206.9 ملی میٹر بارش ریکارڈ کی گئی تھی، جبکہ اس سال 28 ستمبر تک 3515 ملی میٹر بارش ریکارڈ کی گئی ہے، اس اعتبار سے اس بار گذشتہ سال کے مقابلے میں 308.1 ملی میٹر بارش زائد ریکارڈ کی گئی ہے۔
یادگیر میں بجلی گری؛ چار ہلاک
یادگیر میں آج شام کو موسلادھار بارش کے چلتے زبردست بجلی گرنے سے دو الگ الگ مقامات پر تین بچوں سمیت چار لوگوں کی موت واقع ہوگئی۔ بتایا گیا ہے کہ گوڈگیرا دیہات میں کریپّا (15)، ناگراج (14) اور میناکشی(6) کی موت واقع ہوئی، یہ لوگ بکریوں کو چرارہے تھے کہ اچانک بجلی کڑکی اور یہ تینوں بجلی کی زد میں آگئے، جبکہ سورپور میں بجلی گرنے سے ایک شخص ہلاک اور دیگر تین شدید زخمی ہوگئے، یہاں مرنے والے کی شناخت ناگپا ہوسمنی (40) کی حیثیت سے کی گئی ہے۔ زخمیوں کو باگلکوٹ اسپتال میں داخل کیا گیا ہے۔
