ضیاء ایجوکیشنل ٹرسٹ کے زیراہتمام کنڈلور میں ہوا شاندار گیٹ ٹوگیدر پروگرام؛ افطاری میں کنداپور کے اہم ذمہ داران نے کی شرکت
کنڈلور 29/مئی (ایس او نیوز) کنداپور تعلقہ کے کنڈلور قصبہ میں اتوار 27/مئی کو رمضان افطار کے نام پر ایک شاندار گیٹ ٹوگیدر پروگرام منعقد ہوا جس میں کنداپور تعلقہ کی اہم اور قابل شخصیات نے شرکت کی۔
ضیاء ایجوکیشنل اینڈ چیری ٹیبل ٹرسٹ کے زیراہتمام ضیاء پبلک انگلش میڈیم اسکول کنڈلور میں منعقدہ اس پروگرام میں اسلام کا تعارف، رمضان اور روزوں کی حقیقت اور اس کی اہمیت پر تفصیلی روشنی ڈالی گئی اور اسلام کے خلاف پھیلی غلط فہمیوں کو دور کرنے کے تعلق سے بیش قیمت معلومات سے مہمانان کو آگاہ کیا گیا۔
شام 5:30 بجے پروگرام کا آغاز قاری سُہیل صاحب کی تلاوت کلام پاک سے ہوا۔ مولانا ضمیر احمد رشادی نے کنڑا ترجمہ پیش کیا۔ ضیاء اسکول کے پرنسپل جناب عبدالرحمن منی پال نے مہمانوں کا استقبال کیا، جناب محی الدین ماسٹر کوٹیشور نے پروگرام کی غرض و غایت پیش کرتے ہوئے افتتاحی کلمات سے نوازا۔
پروگرام میں شریک ڈاکٹرس، ایڈوکیٹس، پروفیسرس، اخباری نمائندے، سماجی کارکن، سیاسی لیڈران سمیت دیگر اہم شخصیات نے اس موقع پر اپنے اپنے تاثرات پیش کرتے ہوئے ہندوستان کی گنگاجمنی تہذیب میں سبھی مذاہب کے لوگوں کو آپس میں بھائی چارگی اور امن و امان کے ساتھ رہنے پر زور دیا اور اس طرح کے گیٹ ٹو گیدرپروگرام الگ الگ مذاہب کے لوگوں کی طرف سے بار بار منعقد کئے جانے کی طرف عمائدین کی توجہ مبذول کرائی۔
آخر میں ضیاء ایجوکیشنل ٹرسٹ کے صدر مولانا عُبیداللہ ندوی نے خطبہ صدارت پیش کرتے ہوئے اسلام کا مختصر تعارف پیش کرتے ہوئے رمضان اور روزوں کے متعلق تفصیلی روشنی ڈالی اور اس کی اہمیت اور ضرورت کو واضح کیا۔
جناب کوٹا ابراہیم نے پروگرام کی نظامت کی۔ آذان مغرب کے ساتھ ہی تمام مذاہب کے لوگوں نے ایک ساتھ مل بیٹھ کر روزہ افطار کیا جس کے ساتھ ہی پروگرام اپنے اختتام کو پہنچا۔
پروگرام کے فوری بعد اپنے تاثرات پیش کرتے ہوئے اکثر مہمانان نے پروگرام کی بے حد سراہنا کی اور کہا کہ مولانا عُبیداللہ صاحب علاقہ میں امن اور بھائی چارگی کا پیغام عام کرنے کے مقصد سے ہرسال اس طرح کا پروگرام منعقد کرتے ہیں، مگر اب دیگر مذاہب والوں کی طرف سے بھی اس طرح کے گیٹ ٹوگیدر پروگرام کا انعقاد ہونا چاہئے۔
