یلاپور 5؍اکتوبر (ایس او نیوز)یلاپور تعلقہ کے اومچگی نامی مقام پر کالج سے بس کے ذریعے گھر کی طرف سفر کرنے والی ایک طالبہ کے ساتھ بدتمیزی کرنے اور جان سے مارنے کی دھمکی دینے والے چار افراد کو یلاپور پولیس نے گرفتار کرلیا ہے۔

ذرائع سے ملی اطلاع  کے مطابق گرفتار شدگان کی شناخت سبرایا بارکیل سدّی (۳۸سال)، سنتوش بابو سدّی (۲۰سال)، تمنّا سبرایا سدّی (۴۲سال) اور رامو پُٹا سدّی (۲۷سال) کے طور پر کی گئی ہے۔کالج کی طالبہ کی شکایت کے مطابق شراب کے نشے میں مدہوش مذکورہ ملزمان نے بس میں سفر کے دوران جنسی ہراسانی کی کوشش کے ساتھ عصمت دری کرنے اور جان سے مارنے کی دھمکی بھی دی ہے۔جب موقع پر موجود لوگوں نے انہیں روکنے کی کوشش کی تو ان سے بھی جھگڑنے تیار ہوگئے۔ اس پر برہم عوام نے ان چاروں کی خوب دھلائی کرنے کے بعدپولیس کو اطلاع دی۔ جب پولیس تفتیش کے لئے پہنچی تو پولیس والوں پر بھی ان چاروں نے حملہ کرنے کی کوشش کی،جس کے بعد معاملہ درج کرتے ہوئے پولیس نے ان چاروں کو گرفتار کرلیا۔