بھٹکل جالی روڈ پر تعمیر ایک مکان فوریسٹ اہلکاروں کی نذر؛ مکان منہدم
بھٹکل:10/مئی (ایس اؤنیوز)تعلقہ کے جالی میں واقع سروے نمبر 73کی آتی کرم زمین پر آٹھ روز قبل تعمیر کردہ ایک مکان کو محکمہ فوریسٹ کے افسران نے منہدم کردیا۔ جس کے تعلق سے مکان مالک کا کہنا ہے کہ وہ اس مکان میں گذشتہ ۲۵ سالوں سے رہتے آئے ہیں۔
مصدقہ اطلاع پر 50سے زائد پولس فورس کے ساتھ جائے وقوع پر پہنچے فوریسٹ افسران اور عملے نے یہاں کے ایک مکان کو گراتے ہوئے سبھی تعمیراتی سامان بھی اپنے ساتھ لے گئے۔ اس موقع پر ساحل آن لائن سے گفتگو کرتے ہوئے مکان میں رہنے والو ں نے بتایا کہ وہ گذشتہ 25/30 سالوں سے یہاں رہتے آرہے تھے، مگر کچھ عرصہ قبل ان کی چھوٹی سے جھونپڑی کو کسی نے آگ لگادی اور پورا مکان جل کر خاکستر ہوگیا، اُس کے بعد سے فوریسٹ اہلکار ہمیں یہاں مکان تعمیر کرنے نہیں دے رہے تھے، انہوں نے کہا کہ مجبور ہوکر وہ لوگ ایک کرائے کے مکان میں رہنے لگے، جبکہ آٹھ روز قبل ہی ہم نے یہاں چھوٹا سا مکان تعمیر کرکے رہنا شروع کردیا تھا، مگر آج فوریسٹ والوں نے ہمارے مکان کو منہدم کردیا۔ گھروالوں نے بتایا کہ ہمارے پاس یہی ایک چھوٹا سامکان تھا اور یہی چھوٹی زمین ہے، مگر ہمیں یہاں رہنے نہیں دیاجارہا ہے، ان کے مطابق ہر شہری کو مکان تعمیر کرکے دینا سرکار کی بنیادی ذمہ داری ہے، مگر ہمیں ہمارے ہی مکان سے بےگھر کیا جارہا ہے، انہوں نے سوال کیا کہ ایسے حالات میں ہم غریب لوگ کہاں جائیں اور کس سے اپنی شکایت کریں ؟
مکان کو منہدم کرنے کی کاروائی میں اے سی ایف نندیش ریڈی اور آر ایف اؤ رویندر کی قیادت میں پچاس سے زائد پولس اہلکار موجود تھے۔فوریسٹ افسران نے گھر کو منہدم کرنے کے ساتھ ساتھ مکینوں کے خلاف کیس بھی درج کرلیا ہے۔ اس سلسلے میں وضاحت کرتے ہوئے اے سی ایف نندیش ریڈی نے بتایا کہ نئے طورپر جو بھی زمین اتی کرم کی جائے گی،اس کو برداشت نہیں کیاجائے گا۔ اگر اس کو دہرایا گیاتو سخت کارروائی کی جائے گی۔