بنگلورو16؍فروری (ایس او نیوز) معتبر ذرائع سے ملنے والی اطلاعات کے مطابق ریاست میں مخالف دہشت گرد ی اسکواڈ(اے ٹی ایس) کی مزید پانچ یونٹس قائم کی جائیں گی جن میں سے ایک یونٹ منگلورو میں بھی ہوگی۔

معلوم ہوا ہے کہ بنگلورو سٹی کرائم برانچ (سی سی بی) کے تحت اینٹی ٹیرورسٹ اسکواڈ یونٹس کا قیام فروری کے آخر تک ہوجائے گا۔منگلورو کے علاوہ میسورو، ہبلّی، دھارواڑ اور بیلگاوی پولیس کمشنریٹ زونس میں یہ یونٹس تشکیل دی جائیں گی۔یہ یونٹس ریاست میں دہشت گردانہ کارروائیاں روکنے کے لئے انٹرنل سیکیوریٹی ڈیویژن(آئی ایس ڈی)کا تعاون کریں گے۔

بتایا جاتا ہے کہ اس طرح کی مخالف دہشت گردی یونٹس قائم کرنے کا فیصلہ آئی ایس آئی ایس جیسی دہشت گرد تنظیموں کی طرف سے اپنی سرگرمیوں کے لئے کرناٹکا سمیت دیگر جنوبی ریاستوں پر نظر رکھنے کی خفیہ جانکاری ملنے کے بعد کیا گیا ہے۔ریاستی محکمہ پولیس نے متعلقہ زونس کو اے ٹی ایس یونٹس کے قیام کے سلسلے میں ضروری کارروائیاں شروع کرنے کے لئے 7فروری کو ہی سرکیولر جاری کردیا ہے۔خیال رہے کہ فی الحال بنگلورو سی سی بی کے تحت اے ٹی ایس کا دستہ کام کررہا ہے۔

پتہ چلا ہے کہ این آئی اے کی طرف سے ریاستی خفیہ ایجنسی کو یہ اطلاع ملی ہے کہ کچھ نوجوان دہشت گرد گروپوں کے ساتھ جڑ گئے ہیں۔اس لئے محکمہ پولیس کی جانب سے اے ٹی ایس کے جال میں توسیع کرنے کا فیصلہ کیا گیا ہے۔اب جو اے ٹی ایس کی یونٹس بنیں گی اس کی قیادت اسسٹنٹ کمشنر آف پولیس کے ذمہ ہوگی اور اس یونٹ کا کام صرف دہشت گردوں کی سرگرمیوں پر نظر رکھنا ہوگا۔معلوم ہوا ہے کہ ممبئی اور پونے کی اے ٹی ایس یونٹس کے طرز پر کرناٹکا کی اے ٹی ایس کو بھی مضبوط ومستحکم کیا جائے گا۔