ریاست کے ساحلی اور ملناڈ علاقوں میں موسلا دھار بارش جاری لاکھوں روپیوں کا نقصان۔ ریاستی وزیر یوٹی قادر کاافسران کے ساتھ اجلاس
منگلورو9؍جولائی (ایس او نیوز) ریاست کے ساحلی اور ملناڈ علاقوں میں موسلا دھار بارش ہنوز جاری ہے ۔ ریاست بھر میں مزید 4دن تک بارش ہونے کے امکانات ہیں۔ جنوبی کینرا ضلع ،اڈپی ،چکمگلور، کورگ سمیت کئی اضلاع میں موسلا دھار بارش کاسلسلہ جاری ہے ۔
بنٹوال علاقے میں تیز ہواؤں کے ساتھ طوفانی بارش مسلسل ہورہی ہے ۔کئی علاقوں میں دیواریں گرنے ، زمین کھسکنے ،باغیچوں میں پانی جمع ہوجانے سے کئی فصلوں کو کافی نقصان پہنچا ہے۔ جس کی وجہ سے لاکھوں روپیوں کانقصان بتایا گیا ہے۔
موسلا دھار بارش کی وجہ سے نیترا وتی ندی خطرے کے نشان سے اوپر بہنے لگی ہے ۔ کاڈلی دیہات میں پدما نامی عورت پر دیوار کا ایک حصہ گرنے کی وجہ سے وہ بری طرح زخمی ہوچکی ہے ۔ جس کو نجی اسپتال میں بھرتی کرایا گیا ہے ۔ اس کی حالت کافی نازک بتائی گئی ہے۔8میٹر کی اونچائی سے نیترا وتی ندی بہنے لگی ہے ۔ جس سے کافی خطرہ بتایا جارہا ہے ۔اس علاقے کے تمام اسکولس اورکالجوں کو چھٹی دے دی گئی ہے۔
بنٹوال ،بنڈاربٹو ، پٹا منگلا علاقے میں نیتراوتی ندی کا پانی تیزی کے ساتھ بہتے ہوئے دیکھ کر اس علاقے کے چند مکینوں کو منتقل کردیا گیا ہے ۔ چند مکانوں کو کافی نقصان بھی پہنچا ہے۔ برساتی نالے بھر کر پانی سڑکوں پر بہنے کی وجہ سے کئی علاقوں میں زمین کھسک چکی ہے ۔ جس کی وجہ سے بڑی مقدار میں فصلوں کو کافی نقصان پہنچا ہے ۔ اس کے علاوہ موسلا دھار بارش کی وجہ سے پانی سڑکوں پر تیزی کے ساتھ بہنے سے اس علاقے کی کئی سڑکیں بند پڑی ہیں ۔ جس سے گاڑیوں کا گزر مکمل طور پر بند ہوچکا ہے۔ ان سڑکوں کو صاف کرنے کی کارروائی میں بھی بارش رکاوٹ بنی ہوئی ہے۔ راحت کاری کا موں میں بھی پریشانی اٹھانی پڑرہی ہے ۔ دیگر علاقوں کے قومی شاہراہوں پر درخت اور بجلی کے کھمبے زمین بوس ہوچکے ہیں۔ جس سے گاڑیوں کا گزر بھی مشکل ہوچکا ہے ۔ مذکورہ علاقوں میں عام زندگی مفلوج ہوچکی ہے۔
ولڈ۔ سولیتور ، منگلور کی سڑک پر پانی کا بہاؤ زیادہ ہوجانے کی وجہ سے مذکورہ سڑک مکمل طور پربند ہوچکی ہے ۔ ولڈ کے پڈور دیہات میں ابو بکر حاجی کے باغ میں پانی جمع ہوجانے سے تمام فصلیں تباہ ہوچکی ہیں۔ اس کے علاوہ کئی زرعی فصلوں کو بھی نقصان پہنچا ہے۔ بنٹوال تعلقہ میں کل ہوئی موسلا دھار بارش کی وجہ سے لاکھوں روپیوں کا نقصان بتایا گیا ہے ۔
کوپا تعلقہ کے کئی دیہاتوں میں موجود40 سے زائد مکانوں میں پانی داخل ہوجانے کی وجہ سے یہاں مقیم افراد کو رات بھر جاگ کر گزارنا پڑا۔ اس دوران آج منگلور میں ریاستی وزیر برائے ہاؤزنگ یوٹی قادر نے اضلاع کے افسران کے ساتھ اجلاس طلب کرتے ہوئے جنوبی کینرا ضلع میں طوفانی بارش کو مد نظر رکھ کر ہائی الرٹ کااعلان کیا ۔
اجلاس کے بعد اخباری نمائندوں سے بات کرتے ہوئے یوٹی ۔ قادر نے کہا کہ گزشتہ دو دنوں سے جنوبی کینرا ضلع میں تیز ہواؤں کے ساتھ موسلا دھار بارش ہونے لگی ہے ۔ اور محکمہ موسمیات نے بھی پیش گوئی کی ہے کہ 11جولائی تک اس طرح بارش ہوتی رہے گی۔
انہوں نے بتایا کہ جنوبی کینرا ضلع میں مانسون شروع ہونے کے بعد سے اب تک جملہ1958.8ملی میٹر بارش ہوئی ہے ۔ انہوں نے بتایا کہ اجلاس کے دوران انہوں نے افسران کو سخت ہدایت دی ہے کہ وہ ہائی الرٹ رہیں۔جن نشیبی علاقوں میں مکانات ہیں وہاں پانی داخل نہ ہو اس کیلئے درکار اقدامات کریں۔
وزیرموصوف نے بتایا کہ گزشتہ دو دن تک ہوئی بارش کے دوران تقریباً 950مکانوں کو نقصان پہنچا ہے ۔ انہوں نے بتایا کہ انہوں نے افسران کو ہدایت دی ہے کہ وہ نقصان پہنچے مکانوں کی نشاندہی کریں۔انہوں نے بتایا کہ نیشنل ڈزاسٹر ریکوری فریم ورک ٹیم طلب کرلی گئی ہے۔
انہوں نے بتایا کہ کنٹرول روم میں 24گھنٹے بھی کام کرنے کیلئے افسران کو ہدایت دی گئی ہے۔ وزیر موصوف نے 8کشتیاں ، تین کیوبا ڈائیونگ کٹس ،تین کٹنگ مشین جن کی مالیت23لاکھ روپئے ہے اضلاع کے لئے تقسیم کی ہے۔