بھٹکل کے مرڈیشور میں دو لوگوں پر حملے کی پولس تھانہ میں دو الگ الگ شکایتیں
بھٹکل 14/ڈسمبر (ایس او نیوز) تعلقہ کے مرڈیشور میں کل جمعرات کو دو لوگوں پر حملہ اور پھر جوابی حملہ کے تعلق سے آج مرڈیشور تھانہ میں دو الگ الگ شکایتیں درج کی گئی ہیں اور پولس نے دونوں پارٹیوں کی شکایت درج کرتے ہوئے چھان بین شروع کردی ہے۔
پہلی شکایت ملک ریحان ابن سعداللہ خان (21) کی طرف سے درج کی گئی ہے جس میں انہوں نے بتایا ہے کہ وہ اپنے ایک دوست محمد سمعان ابن عبداللہ شیخ (20) کے ساتھ بستی مکی میں اپنے مکان کے قریب ہی کھڑا تھا کہ جینت نائک اور اس کا ایک ساتھی نرسمہا بائرا نائک وہاں آدھمکے ۔ اور ہم پر غلط اور بے بنیاد الزام لگایا کہ ہم یہاں لڑکیوں کو چھیڑتے ہیں، جب ہم نے اس کی غلط فہمی دور کرنے کی کوشش کی تو دونوں نے ہم پر حملہ کیا، ہماری پیٹائی کی اور جیب میں موجود 17000 نقد رقم لے کر فرار ہوگئے۔
دوسری طرف جینت نائک نے ریحان اورمحمد سمعان کے خلاف شکایت درج کرتے ہوئے کہا ہے کہ وہ بستی مکی میں ناریل کا پانی پینے گیا تھا جس کے دوران ان دونوں نے یہ کہہ کر حملہ کیا کہ میں نے مسجد کو الیکٹری سٹی کنکشن دینے پر پنچایت میں اعتراض کیا تھا، جینت نائک نے اپنی شکایت میں یہ بھی کہا ہے کہ ان دونوں نے اس پر تلواروں سے حملہ کرنے کی کوشش کی اور اس کے گلے میں موجود دو تولہ سونے کا چین لے کر فرار ہوگئے۔
مرڈیشور پولس تھانہ میں دونوں شکایتوں کو درج کیا گیا ہے اور تھانہ آفسر لوکیش نائک معاملے کی جانچ کررہے ہیں۔
خیال رہے کہ جینت نائک سری رام سینا کا ضلعی صدر ہے۔
