چکبلاپور کے شڈلگٹہ میں کوہ نور ٹیپو تعلیم مائنارٹی ٹرسٹ کی جانب سے پلوامہ میں شہید فوجیوں کو خراج عقیدت؛ اہل خانہ کو پانچ کروڑ روپیہ معاوضہ دینے کا مطالبہ
شڈلگٹہ 22/فروری (ایس او نیوز) ضلع چک بلاپورکے شڈلگٹہ میں کوہ نور ٹیپو تعلیم مائنارٹی ویلفئیر ٹرسٹ شڈلگٹہ کی زیر قیادت ہزاروں مسلمانوں نے 14فروری کو کشمیر کے پلوامہ میں دہشت گردوں کا نشانہ بنے سی آر پی ایف جوانوں کی شہادت کو خراج عقیدت پیش کیا اور دہشت گردانہ کاروائیوں کی سخت مذمت کی۔
اس موقع پر تحصیلدار کو میمورنڈم پیش کرتے ہوئے کہاگیا کہ 14فروری ہمارے ملک کے لئے ایک سیاہ دن ہے۔ مرکزی حکومت ،جموں کشمیر کی حکومت اور انٹلی جنس ایجنسیاں باہمی مشورے و تعاون سے کام نہ کرنے کی وجہ سے سرحد کی حفاظت میں لگے ہوئے فوجی، دہشت گردوں کا نشانہ بنے ہیں، ٹرسٹ نے اس تعلق سے حکومت سے جانچ کا مطالبہ کیا۔ مزید بتایا گیا کہ دہشت گردوں کی سیاہ کاری پر ملک کے عوام خاموش نہیں بیٹھیں گے۔ بلکہ اس کا سخت جواب دینے کےلئے تیار رہیں گے۔ تحریر میں شہید جوانوں کے اہل خانہ کو 5 کروڑ روپئے معاوضہ اور خاندان کے ہرفرد کو سرکاری ملازمت فراہم کرنے کا بھی مطالبہ کیا گیا ہے۔ اس موقع پر ٹرسٹ کے عہدیداران ، ممبران اور شہر کے ہزاروں عوام موجود تھے۔