بھٹکل مدینہ کالونی میں بس راہ گیر سے ٹکراگئی؛ اسپتال لے جانےتک راہ گیر کی موت
بھٹکل 23/مئی (ایس او نیوز) یہاں مدینہ کالونی نیشنل ہائی وے پر ایک پرائیویٹ بس ایک راہ گیر سے ٹکرانے کے نتیجے میں راہ گیر اسپتال لے جانے تک چل بسا، جس کی شناخت شرالی کے رہنے والے موہن دیوپا موگیر (30) کی حیثیت سے کی گئی ہے۔
عینی شاہدین نے بتایا کہ موہن نیشنل ہائی وے کے کنارے سے چلتا ہوا سرکل کی طرف جارہا تھا جبکہ بس بھی بینگلور جانے کے لئے مسافروں کو سوار کرنے سرکل کی طرف جارہی تھی، لوگوں نے دیکھا کہ بس کے سائیڈ کی ڈکّی کا دروازہ کھلا ہوا تھا، جو تیز رفتاری کے ساتھ موہن سے ٹکرا گیا۔ ٹکر اتنی شدید تھی کہ راہ گیر کو لگتے ہی ڈکّی کا دروازہ بس سے الگ ہوکر راستے پر ہی گر گیا، جبکہ دروازے کی ٹکر سے موہن کا پیٹ پھٹ گیا، نیچے گرنے پر سر پر بھی چوٹ لگی، جائے وقوع پر موجود نوجوانوں نے موہن کو فوری بھٹکل سرکاری اسپتال پہنچایا، مگر ڈاکٹر نے بتایا کہ اس کی موت واقع ہوچکی ہے۔
راہ گیر کو ٹکر مارنے کے بعد بس ڈرائیور نے بس کو سڑک کے کنارے پارک کرتے ہوئے بس کو چالو حالت میں ہی رکھ کر فرار ہوگیا، حادثے کی اطلاع ملتے ہی مضافاتی پولس کے اہلکار جائے وقوع پر پہنچے اور بس کو اپنی تحویل میں لیتے ہوئے پولس تھانہ لے گئے۔
بتایا گیا ہے کہ موہن موگیر ایک ماہی گیر تھا، اس کا خاندان نہایت غریب ہے۔
